Oʻzbekiston – Germaniya hamkorligida kasbiy taʼlim tizimini rivojlantirishning yangi bosqichi muhokama qilindi
2025-11-05 18:20:00 / Vazirlik yangiliklari
5-noyabr kuni Oliy taʼlim, fan va innovatsiyalar vaziri Qoʻngʻirotboy Sharipov Germaniyaning “KfW” taraqqiyot bankining Sharqiy Yevropa, Kavkaz va Markaziy Osiyo departamenti direktori Veronika Garsiya Del Arko hamda mazkur bankning Toshkentdagi Markaziy Osiyo mintaqaviy ofisi direktori Petar Georgiyev bilan uchrashdi.
Muloqot chogʻida kasbiy taʼlim tizimini takomillashtirishga qaratilgan hamkorlikdagi loyihalarning ijrosi va kelgusidagi ustuvor yoʻnalishlar muhokama etildi.
Tomonlar “Kasbiy taʼlim tizimini takomillashtirish” loyihasining amalga oshirilish jarayonini koʻrib chiqdilar. Ushbu loyiha doirasida respublikaning 8 ta viloyatida namunaviy kasbiy taʼlim muassasalari – Ilgʻor kasbiy tayyorgarlik markazlari tashkil etilishi koʻzda tutilgan. Loyihaning maqsadi – taʼlim muassasalarining moddiy-texnik bazasini mustahkamlash, oʻquv jarayoniga Germaniya tajribasini joriy etish hamda ish beruvchilar bilan oʻzaro hamkorlikni kuchaytirishdan iborat.
Uchrashuvda, shuningdek, “Kasbiy taʼlimni qoʻllab-quvvatlash (3-bosqich)” loyihasi konsepsiyasi haqida ham fikr almashildi. Mazkur loyihalarni amalga oshirish jarayonida vazirlik mutaxassislari “KfW” banki va loyiha konsultantlari bilan yaqin hamkorlikda ish olib boradi. Shu bilan birga, kelgusida tayyorlanadigan kadrlarning malakasi xalqaro standartlarga mos boʻlishi va xorijiy mehnat bozorida tan olinishi muhim ahamiyat kasb etadi.
Uchrashuv yakunida tomonlar mavjud hamkorlik loyihalarini amalga oshirishni jadallashtirish va yangi yoʻnalishlarda qoʻshma tashabbuslarni ilgari surishga kelishib oldilar.