O‘zbekistonda YUNESKO Global Konvensiyasi ratifikatsiyasiga bag‘ishlangan taqdimot o‘tkazildi
2025-11-04 17:05:00 / Vazirlik yangiliklari
Tadbir YUNESKO Bosh konferensiyasining 43-sessiyasi doirasida tashkil etilib, O‘zbekistonning xalqaro ta’lim hamkorligini kengaytirish va diplomlarni o‘zaro tan olish jarayonlarini soddalashtirishga xizmat qiladi.
Taqdimot ochilishida YUNESKO Bosh direktorining ta’lim bo‘yicha o‘rinbosari Stefaniya Jannini, YUNESKO byurosi raisi Stig Arne Skjerven, YUNESKO bo‘lim direktori Borhen Chakroun, Janubiy Afrika, Qozog‘iston va Tojikiston vakillari hamda O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov so‘zga chiqishdi.
Mutasaddilar Konvensiyaning xalqaro ta’lim tizimini uyg‘unlashtirish va malakalarni o‘zaro tan olishdagi ahamiyatini ta’kidlashdi. Shuningdek, O‘zbekistonning bu boradagi faol ishtiroki va tashabbuslari yuqori baholandi.
Taqdimotda YUNESKO rahbariyati vakillari, xalqaro delegatsiyalar, shuningdek, O‘zbekiston oliy ta’lim muassasalari vakillari ishtirok etdi.
Tadbir davomida konvensiyaning milliy ta’lim tizimiga tatbiq etilishi, uning xalqaro e’tirof va bitiruvchilarning raqobatbardoshligini oshirishdagi ahamiyati muhokama qilindi.
Ushbu tashabbus O‘zbekistonning xalqaro ta’lim hamjamiyatidagi faolligini kuchaytirib, milliy diplomlarning jahon miqyosida tan olinishi yo‘lida muhim qadam bo‘ladi.