O‘zbekiston Respublikasi Oliy taʼlim, fan va innovatsiyalar vazirligi

Ko‘rgazmaning ochilish marosimida O‘zbekiston Respublikasi oliy ta’lim, fan va innovatsiyalar vaziri Qo‘ng‘irotboy Sharipov, Yaponiyaning O‘zbekistondagi Favqulodda va muxtor elchisi Hirata Kenji  hamda O‘zbekiston–Yaponiya markazi hamdirektori Ivazaki Xiro janoblari  ishtirok etdilar.

Vazir Q. Sharipov o‘z nutqida ikki mamlakat o‘rtasidagi ta’lim va fan sohasidagi hamkorlikning izchil rivojlanayotganini ta’kidlab, uning amaliy natijalariga to‘xtalib o‘tdi. Xususan, so‘nggi yillarda Yaponiya universitetlari bilan yo‘lga qo‘yilgan qo‘shma ta’lim dasturlari, ilmiy-tadqiqot loyihalari va talabalar almashinuvi orqali O‘zbekistonlik yoshlar uchun keng imkoniyatlar yaratilganini qayd etdi.

Ta’kidlash joizki, bu yilgi "Japan Education Fair 2025" ko‘rgazmasi ilk bor uchta shaharda — Samarqand, Toshkent va Buxoroda o‘tkazilmoqda. 1 noyabr kuni Samarqand davlat universitetida start olgan mazkur tadbir bugun Toshkentda, 5 noyabr kuni esa Buxoro davlat universitetida davom etadi.

Ko‘rgazmada Yaponiyaning 11 ta nufuzli universiteti — Tokio, Sukuba, Nagoya, Nagoya iqtisodiyot universiteti, Kioto ilmiy tadqiqotlar universiteti, Keyo universiteti (Shonan Fujisava kampusi), Osaka universiteti, Nagasaki universiteti, Toyo universiteti, Ilg‘or tadqiqotlar milliy universiteti (SOKENDAI) hamda Ritsumeykan Osiyo-Tinch okeani universiteti (APU) ishtirok etmoqda.

Tadbirning asosiy maqsadi — o‘zbekistonlik yoshlarni Yaponiyadagi ta’lim imkoniyatlari bilan yaqindan tanishtirish, ikki mamlakat oliy ta’lim muassasalari o‘rtasida talabalar va professor-o‘qituvchilar almashinuvini yanada rivojlantirishdir.

Bugungi Toshkent tadbiri doirasida Yaponiya universitetlari va ilmiy tashkilotlari o‘z taqdimotlarini o‘tkazdi. Shuningdek, yapon universitetlari bitiruvchilari talabalik tajribasi va Yaponiyadagi hayot haqida fikrlarini o‘rtoqlashdilar.

Yaponiya universitetlari o‘zbekistonlik yoshlar uchun turli grant dasturlarini taqdim etmoqda. Ularning orasida Yaponiya hukumati grantlari, JICA va JASSO tashkilotlarining ta’lim stipendiyalari, hamda alohida universitetlar tomonidan ajratiladigan moliyaviy qo‘llab-quvvatlash dasturlari mavjud. Bu grantlar orqali talabalar magistrlik va doktorantura bosqichlarida bepul tahsil olish, ilmiy izlanishlar olib borish va Yaponiya kompaniyalarida amaliyot o‘tash imkoniga ega bo‘ladilar.

Shuningdek, forum ishtirokchilariga yaqinda Samarqand shahrida bo‘lib o‘tgan O‘zbekiston–Yaponiya oliygohlari rektorlarining beshinchi forumi natijalari haqida ham ma’lumot berildi. Forum doirasida 30 dan ortiq O‘zbekiston oliygohlari va Yaponiyaning 15 dan ziyod universitetlari o‘rtasida to‘g‘ridan-to‘g‘ri hamkorlik o‘rnatilib, 10 dan ziyod qo‘shma shartnomalar imzolangani ta’kidlandi.

Ta’lim ko‘rgazmasi keng jamoatchilik — o‘rta maktab o‘quvchilari, talabalar, ularning ota-onalari, o‘qituvchilar hamda Yaponiyada ta’lim olishga qiziqqan fuqarolar uchun ochiq bo‘ldi.

"Japan Education Fair 2025" ta’lim ko‘rgazmasi O‘zbekiston va Yaponiya o‘rtasidagi ta’limiy, ilmiy va madaniy hamkorlikni yanada mustahkamlash, yoshlarni Yaponiyaning ilg‘or ta’lim tizimi va xalqaro imkoniyatlari bilan yaqindan tanishtirishda muhim ahamiyat kasb etmoqda.