Oʻzbekiston va Pokiston taʼlim, fan va kasbiy tayyorgarlik sohasida hamkorlikni rivojlantirishga kelishib oldilar
2025-11-01 18:00:00 / Vazirlik yangiliklari
Uchrashuvda taʼlim, ilmiy tadqiqotlar, talabalar va professor-oʻqituvchilar almashinuvi, shuningdek, kasbiy taʼlim yoʻnalishlarida hamkorlikni yoʻlga qoʻyish masalalari muhokama qilindi.
Qoʻngʻirotboy Sharipov Oʻzbekistonda taʼlim tizimida olib borilayotgan islohotlar, ilmiy salohiyatni rivojlantirish va innovatsion tashabbuslarni qoʻllab-quvvatlash boʻyicha amalga oshirilayotgan ishlar haqida maʼlumot berdi.
Vajixa Qamar xonim Oʻzbekistonning kasbiy taʼlim sohasidagi tajribasiga katta qiziqish bildirdi va bu boradagi hamkorlik ikki mamlakat uchun muhim natijalar berishiga ishonch bildirdi. Shuningdek, u Oʻzbekiston tajribasidan foydalangan holda Pokistonda xususiy taʼlim sektori rivojlanishini qoʻllab-quvvatlash niyatini bildirdi.
Uchrashuvda, shuningdek, tibbiyot, toʻqimachilik va sanoat sohalarida hamkorlikni yoʻlga qoʻyish, masofaviy taʼlim loyihalarini amalga oshirish, yoshlar bandligini taʼminlash va mehnat migratsiyasi sohasida tajriba almashish kabi masalalar ham muhokama qilindi.
Tomonlar ikki mamlakat oʻrtasida hamkorlikda yuqori malakali mutaxassislar tayyorlash, ilmiy va amaliy loyihalarni qoʻshma tarzda amalga oshirish hamda kasbiy taʼlim sohasida xalqaro tanlovlar va tashabbuslarni yoʻlga qoʻyish boʻyicha kelishib oldilar.