O‘zbekiston Respublikasi Oliy taʼlim, fan va innovatsiyalar vazirligi

Uchrashuv avvalida Ichki ishlar vazirligi akademiyasi boshlig‘i Rustam Xatamov so‘zga chiqib, ta’lim muassasasida so‘nggi yillarda amalga oshirilayotgan islohotlar, zamonaviy ta’lim yondashuvlari hamda natijadorlikning asosiy ko‘rsatkichlari yuzasidan ma’lumot berdi. U o‘quv jarayoniga ilg‘or axborot texnologiyalari joriy etilayotgani, tinglovchilarning kasbiy tayyorgarligini oshirishga alohida e’tibor qaratilayotganini ta’kidladi.

Tadbir davomida oliy ta’lim tizimida kechayotgan tub o‘zgarishlar, ta’lim siyosatini yangi bosqichga olib chiqishga qaratilgan chora-tadbirlar, sohani modernizatsiya qilishning strategik yo‘nalishlari haqida batafsil so‘z yuritildi.

Vazir ta’lim tizimida raqobatbardoshlikni oshirish, ilm-fan va ishlab chiqarish integratsiyasini kuchaytirish, oliy o‘quv muassasalarida zamonaviy boshqaruv modellarini joriy etish, xalqaro hamkorlikni kengaytirish hamda global mehnat bozorida raqobatga bardosh bera oladigan yetuk mutaxassislarni tayyorlash bugungi kunning eng dolzarb vazifalaridan biri ekanini alohida ta’kidladi.

Shuningdek, uchrashuvda yoshlar jinoyatchiligi va huquqbuzarliklarning oldini olish masalasi borasida ham fikr almashildi. Zamonaviy tahdidlar kuchayib borayotgan sharoitda yoshlarning ma’naviyatini yuksaltirish, ta’lim muassasalarida huquqbuzarliklarning barvaqt oldini olish hamda huquqiy madaniyatni oshirish muhimligi qayd etildi. Bu borada Ichki ishlar vazirligi akademiyasi mutaxassislari tomonidan amalga oshirilayotgan profilaktik tadbirlar ijobiy samara berayotgani ta’kidlandi.