Ilmiy izlanish olib borayotgan tadqiqotchilar bilan uchrashuv o‘tkazildi
2025-10-17 17:55:00 / Vazirlik yangiliklari
Tadbirda ta’lim va fan sohalarida amalga oshirilayotgan islohotlar, oliy malakali ilmiy va ilmiy-pedagog kadrlar tayyorlash hamda ularning attestatsiya tizimini takomillashtirish masalalari muhokama qilindi.
Ma’lumotlarga ko‘ra, 2017-yildan buyon oliy ta’limdan keyingi ta’lim tizimiga 56 mingdan ortiq tadqiqotchi qabul qilingan. Shundan 24 ming nafari davlat granti asosida, 32 ming nafari esa mustaqil izlanuvchi sifatida faoliyat yuritmoqda. Shu davrda 3,6 ming nafar fan doktori va 18,8 ming nafar falsafa doktori ilmiy darajasini himoya qilgan.
Uchrashuvda dissertatsiyalar sifati, ilmiy natijalarni amaliyotga joriy etish, attestatsiya jarayonini raqamlashtirish, shuningdek, ilmiy faoliyat samaradorligini oshirish masalalari yuzasidan fikr almashildi.
Tadbir yakunida ilmiy kadrlar attestatsiyasi tizimini yanada rivojlantirish bo‘yicha amaliy takliflar ishlab chiqildi hamda ularning ijrosini parlament nazorati orqali ta’minlash choralari belgilandi.