Xorazmda “Talaba Expo 2025” kasb ko‘rgazmasi boshlandi
2025-10-16 11:20:00 / Vazirlik yangiliklari
Mazkur tadbir Oliy ta’lim, fan va innovatsiyalar vazirligi, “O‘zmilliybank” AJ, O‘zbekiston Savdo-sanoat palatasi, Xorazm viloyati hokimligi, Kambag‘allikni qisqartirish va bandlik vazirligi hamda Yoshlar ishlari agentligi hamkorligida tashkil etildi.
Ko‘rgazmaning asosiy maqsadi — bitiruvchi talabalarga mehnat bozoridagi mavjud imkoniyatlar, zamonaviy kasblar, stajirovka va amaliyot dasturlari haqida batafsil ma’lumot berish, shuningdek, yoshlar bandligini ta’minlashga ko‘maklashishdan iborat.
Tadbirda Xorazm viloyatida faoliyat yuritayotgan yirik korxona va tashkilotlar, bank-moliya muassasalari, innovatsion markazlar hamda xususiy tadbirkorlik subyektlari o‘z ish o‘rinlari, loyihalari va amaliy dasturlarini taqdim etmoqda.
Ko‘rgazma doirasida yoshlar uchun:
ish o‘rinlari yarmarkasi;
amaliyot va stajirovka dasturlari haqida ma’lumotlar;
startap loyihalarni taqdim etish imkoniyatlari;
“O‘zmilliybank” tomonidan taklif etilayotgan imtiyozli kreditlar va moliyaviy savodxonlikka oid seminarlar;
bandlik masalalariga doir konsultatsiyalar o‘tkazilmoqda.
“Xorazm – Talaba Expo 2025” yoshlar uchun nafaqat o‘z kasbiy yo‘nalishini to‘g‘ri tanlash, balki mehnat bozorida faol ishtirok etish va o‘z salohiyatini namoyon etish uchun keng imkoniyat yaratmoqda.