O‘zbekiston Respublikasi Oliy taʼlim, fan va innovatsiyalar vazirligi

Mazkur topshiriq ijrosini ta’minlash maqsadida Oliy taʼlim, fan va innovatsiyalar vazirligi tomonidan Oʻzbekiston Respublikasining “Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish haqida”gi Qonuni loyihasi ishlab chiqildi.

Yangi qonun loyihasi orqali 2 ta “Taʼlim toʻgʻrisida”gi va “Litsenziyalash, ruxsat berish va xabardor qilish tartib-taomillari toʻgʻrisida”gi Qonunlarga oʻzgartirish va qoʻshimchalar kiritish taklifi berilmoqda.

1 “Taʼlim toʻgʻrisida”gi Qonunga:

a) oliy ta’lim tashkilotlarida muqobil ta’limning kredit-modul tizimiga asoslangan, talabalarning o‘qish va ishlashini birgalikda olib borish imkonini beruvchi, o‘qish an’anaviy kunduzgi ta’lim shakliga qaraganda ko‘proq moslashuvchan va vaqt bo‘yicha qulaylik yaratadigan, haftalik o‘quv yuklamasi (soatlari) kamaytirilgan, o‘qish davomiyligi kunduzgi ta’lim shakliga nisbatan kamida bir yarim barobar ko‘p o‘qish muddatini tashkil etadigan maqbullashtirilgan kunduzgi ta’lim shaklining ta’rifini berish;

b) oʻrta maxsus, kasbiy, oliy va oliy taʼlimdan keyingi taʼlim, shuningdek, kadrlarni qayta tayyorlash va ularning malakasini oshirish, malakalarni baholash sohalarida tashqi sifat nazoratini amalga oshiruvchi maxsus vakolatli davlat organi sifatida Oʻzbekiston Respublikasi Prezidenti huzuridagi Taʼlim sifatini taʼminlash milliy agentligining vakolatlarini kiritish;

d) kompleks davlat akkreditatsiyasi natijalariga koʻra muayyan taʼlim dasturida aniqlangan qoʻpol kamchiliklar belgilangan muddatda bartaraf etilmagan taqdirda ushbu taʼlim dasturi boʻyicha oʻquv faoliyatini davom ettirish va qabulni amalga oshirishga yoʻl qoʻyilmasligi;

2) “Litsenziyalash, ruxsat berish va xabardor qilish tartib-taomillari toʻgʻrisida”gi Qonunga:

a) 1-ilovaning 9-pozitsiyasi “Litsenziyalanadigan faoliyatning kichik turlari” degan ustunidagi “professional ta’lim xizmatlari” degan so‘zlar “kasbiy ta’lim xizmatlari” degan so‘zlar bilan almashtirish;

b) 3-ilovaning 12-pozitsiyasi “Xabardor qilish tartib-taomillari sohasidagi vakolatli organlar” degan ustunidagi “vazirligi” degan so‘zdan keyin “, O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi” degan so‘zlar bilan to‘ldirish belgilanmoqda.

15-oktabr kuni Qonun loyihasi idoraviy kelishuv uchun “Normativ-huquqiy hujjatlar loyihalarini ishlab chiqish va kelishishning yagona elektron tizimi”ga joylashtirildi.

Mazkur Qonun loyihasining qabul qilinishi tegishli qonunlarni amaldagi qonunchilik hujjatlariga muvofiqlashtirilishiga erishiladi.

Fuqarolar Qonun loyihasi muhokamasida 2025-yil 30-oktabrga qadar (shu kuni ham) ishtirok etishlari mumkin.

Loyiha matni bu yerda: https://regulation.adliya.uz/project/6861/18316?contentLang=uz