Turkiy universitetlar ittifoqi 8-Bosh Assambleyasi — ilm, birlik va taraqqiyot sari hamkorlik maydoni
2025-10-15 17:05:00 / Vazirlik yangiliklari
Mazkur nufuzli tadbir Turkiy davlatlar xalqaro universiteti mezbonligida o‘tkazilib, unda Turkiy davlatlar tashkiloti Kotibiyati, Turkiy akademiya, TÜRKÜNİBga a’zo 100 dan ortiq universitetlar rahbarlari, ilmiy markazlar, xalqaro tashkilotlar va taniqli olimlar ishtirok etdi. Forum turkiy xalqlarning ilm-fan sohasidagi birlashuvini mustahkamlash, yosh avlodni ilmga va yangilikka intilishga chorlovchi muhim voqea sifatida tarixda o‘z o‘rnini egalladi.
Assambleya sho‘ba yig‘ilishlarini Turkiy davlatlar xalqaro universiteti rektori Bahodir To‘rayev ochib berar ekan, turkiy mamlakatlarning yetuk olimlari, professorlari va yosh tadqiqotchilari ilm, birlik va taraqqiyot yo‘lida bir maqsad atrofida birlashayotgani bu anjumanning eng muhim natijasi ekanini ta’kidladi.
Turk akademiyasi eksperti Ebulfez Sulaymonli o‘z chiqishida “Turk Barometri 2025: Turk davlatlari yoshlar tadqiqoti” loyihasi natijalari bilan o‘rtoqlashdi. Ushbu keng qamrovli ijtimoiy tadqiqot turkiy mamlakatlar yoshlarining qadriyatlari, ijtimoiy yo‘nalishlari va madaniy aloqalarini o‘rganishga qaratilgan bo‘lib, u turkiy dunyo kelajagini belgilovchi muhim ilmiy manba sifatida e’tirof etildi.
Qirqqal’a universiteti rektori, professor Ersan Aslan esa TÜRKÜNİB doirasida olib borilayotgan hamkorlik tashabbuslari yoshlarni ilm-fanga jalb etish va turkiy akademik makonning raqobatbardoshligini oshirishda muhim o‘rin tutishini qayd etdi.
Assambleyaning sho‘ba yig‘ilishlari yakunida 20 dan ortiq hamkorlik shartnomalari imzolandi. Sho‘balarda Turkiy davlatlar tashkiloti Bosh kotibi Kubanichbek Omuraliyev, Turkiy akademiya prezidenti Shahin Mustafoyev hamda Oliy ta’lim, fan va innovatsiyalar vazirining birinchi o‘rinbosari Sardor Rajabov ishtirok etib, Turkiy davlatlar xalqaro universiteti ikki tomonlama ta’lim, ilmiy-tadqiqot va innovatsion hamkorlikni yanada kengaytirishda markaziy o‘rin tutishini, yoshlarni yangi marralarga yetaklovchi ilmiy maydonga aylanishiga ishonch bildirdilar.
Turkiy davlatlar xalqaro universiteti bugungi kunda turkiy sivilizatsiyani yuksaltirish g‘oyasini amaliy faoliyatga tatbiq etib, ilg‘or bilimlar, ilm-fan va innovatsiyalarni qo‘llab-quvvatlash orqali ijodkor, iste’dodli va fidoyi yoshlar uchun yangi imkoniyatlar yaratmoqda. Bu yo‘nalish, o‘z navbatida, turkiy dunyo yangi Renessans davrini barpo etish sari dadil odimlayotganini ifodalaydi.