O‘zbekiston Respublikasi Oliy taʼlim, fan va innovatsiyalar vazirligi

Bugun, 2025-yil 15-oktabr kuni Toshkent xalqaro universitetida Turkiy davlatlar tashkiloti huzuridagi Turkiy universitetlar ittifoqi (TÜRKÜNİB)ning 8-Bosh Assambleyasi o‘z ishini boshladi.

Assambleya ochilish marosimida O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari Hilola Umarova, Oliy ta’lim, fan va innovatsiyalar vaziri Qo‘ng‘irotboy Sharipov, Turkiy davlatlar tashkiloti bosh kotibi Kubanychbek Omuraliyev hamda Turkiy akademiya prezidenti Shahin Mustafayev so‘zga chiqishdi.

Tadbirda Turkiy davlatlar tashkiloti va TURKSOY rahbariyati, Oliy ta’lim, fan va innovatsiyalar vazirligi vakillari, TÜRKÜNİBga a’zo oliy ta’lim muassasalari rektorlari, Turkiy akademiya va boshqa tashkilotlar vakillari ishtirok etmoqda.

Assambleyada Ozarbayjon, Turkiya, Qozog‘iston, Qirg‘iziston, Vengriya, Shimoliy Kipr va O‘zbekistondagi jami 69 ta universitetdan 200 nafarga yaqin delegat qatnashmoqda.

Kun tartibiga TÜRKÜNİBga yangi a’zolarni qabul qilish, “Orhun” almashinuv dasturini takomillashtirish, doimiy kotibiyat va maxsus dastur jamg‘armasini tashkil etish, Turkiya va Vengriya tomonlarining yangi tashabbuslarini muhokama qilish masalalari kiritilgan.

Shuningdek, O‘zbekiston tomonidan ilgari surilgan “Turkiy ilm-fan va innovatsiyalar kunlari”ni o‘tkazish tashabbusi ham ko‘rib chiqilmoqda. Tadbir doirasida Turkiy akademiyaning “TurkBarometer” loyihasi natijalari taqdimoti o‘tkazilishi rejalashtirilgan.

Assambleya doirasida Turkiy davlatlar xalqaro universitetida TÜRKÜNİBga a’zo O‘zbekiston universitetlari ko‘rgazmasi hamda U2U (University-to-University) shaklidagi uchrashuvlar tashkil etiladi.

Tadbirning ikkinchi kuni – 16-oktabrda Toshkent davlat sharqshunoslik universitetida “Qoraxoniylar – Alp Er Tunga (Afrosiyob) avlodlari: Qoraxoniylar davridagi turkiy va islom olami” mavzusida xalqaro ilmiy konferensiya o‘tkazilishi belgilangan.