Butunjahon standartlar kuni munosabati bilan ko‘rgazma o‘tkazildi
2025-10-14 17:20:00 / Vazirlik yangiliklari
Tadbir poytaxtimizdagi “INNO” innovatsion o‘quv va ishlab chiqarish texnoparki hududida o‘tkazildi. Unda mahalliy va xorijiy oliy ta’lim muassasalari, ilmiy-tadqiqot institutlari hamda tadbirkorlik sub’yektlari ishtirok etdi.
Tadbirda Oliy ta’lim, fan va innovatsiyalar vaziri Qo‘ng‘irotboy Sharipov ham qatnashdi.
Ko‘rgazma doirasida soha vakillarini taqdirlash marosimi ham bo‘lib o‘tdi. Unda “Yil standartchisi – 2025” va “Sifat sohasidagi mukofot” milliy mukofotlari sovrindorlari e’tirof etildi.
Ishtirokchilar standartlashtirish, metrologiya va muvofiqlikni baholash yo‘nalishlaridagi innovatsion loyihalar, ilg‘or texnologiyalar va amaliy yechimlar bilan yaqindan tanishish imkoniyatiga ega bo‘lishdi.
Shuningdek, Oliy ta’lim, fan va innovatsiyalar vazirligi hamda Agentlik tashabbusi bilan raqamli transformatsiya, ishlab chiqarish jarayonlarini standartlashtirish, yangi o‘lchov asboblari va sertifikatlash tizimlarini joriy etish mavzularida taqdimotlar o‘tkazildi.
Tadbir yakunida ishtirokchilarga sertifikatlar topshirildi, eng yaxshi ishlanmalar alohida taqdirlandi hamda fotolavha tashkil etildi.