Özbekiston Respublikasi Ta’lim va ilm-fan vazirligi

Uchrashuvda ikki mamlakat o‘rtasidagi oliy ta’lim, ilm-fan va innovatsiyalar sohasidagi hamkorlikni yanada kengaytirish, amalga oshirilayotgan qo‘shma loyihalarning borishini muhokama qilish hamda yangi tashabbuslarni amalga oshirish masalalari ko‘rib chiqildi.

Tomonlar so‘nggi yillarda oliy ta’lim sohasidagi munosabatlar izchil rivojlanib borayotganini, jumladan, Toshkent davlat agrar universiteti, Toshkent davlat iqtisodiyot universiteti, O‘zbekiston davlat jahon tillari universiteti kabi oliygohlar va Gruziyaning yetakchi universitetlari — Tbilisi davlat universiteti, Telavi davlat universiteti hamda Gruziya texnika universiteti o‘rtasida samarali hamkorlik yo‘lga qo‘yilganini ta’kidladilar.

Uchrashuvda “Uzumchilik va vinochilik” yo‘nalishida 1+1 modelidagi qo‘shma ta’lim dasturini amalga oshirish, turizm sohasida qo‘shma yo‘nalishlarni tashkil etish, shuningdek, O‘zbekiston davlat jahon tillari universiteti qoshida gruzin tili markazini ochish masalalari muhokama etildi.

Shu bilan birga, ilm-fan va innovatsiyalar sohasida hamkorlikni kuchaytirish, yosh olimlar uchun stajirovkalar tashkil etish, startap tashabbuslarini qo‘llab-quvvatlash va ilmiy loyihalarni birgalikda amalga oshirish masalalari ham ko‘rib chiqildi.

Tomonlar talabalar va professor-o‘qituvchilar o‘rtasida doimiy almashinuv tizimini joriy etish, hamkorlikda ta’lim forumlarini o‘tkazish bo‘yicha kelishib oldilar.

Uchrashuv yakunlariga ko‘ra, ikki mamlakat vazirliklari va oliy ta’lim muassasalari o‘rtasidagi aloqalarni yanada mustahkamlashga qaratilgan qator amaliy vazifalar belgilab olindi.