O‘zbekiston Respublikasi Oliy taʼlim, fan va innovatsiyalar vazirligi

Oliy taʼlim, fan va innovatsiyalar vazirligi, “Oʻzmilliybank” AJ, Savdo-sanoat palatasi, Qashqadaryo viloyati hokimligi hamda “Kelajakka qadam” markazi hamkorligida tashkil etilgan ushbu tadbir talaba-yoshlar va ish beruvchilarni bir maydonda jamladi.

Koʻrgazma bitiruvchi talabalarning bandligiga koʻmaklashish, ularning malakasiga mos ish topishlariga amaliy yordam berish, ish beruvchilar bilan bevosita muloqot maydonini yaratish, shuningdek tadbirkorlikka qiziqqan yoshlarni moliyaviy qoʻllab-quvvatlash imkoniyatlarini kengaytirishga xizmat qildi.

Tadbir davomida talabalarga mavjud boʻsh ish oʻrinlari va tadbirkorlik imkoniyatlari taqdim etildi. Tadbirkorlar tomonidan ish oʻrinlari yarmarkasi tashkil etilib, “Kelajakka qadam” dasturi doirasidagi kredit mahsulotlari haqida maʼlumotlar berildi hamda istiqbolli biznes loyihalar qabul qilindi.

“Oʻzmilliybank” AJ tomonidan bank xizmatlari va mahsulotlari taqdimoti oʻtkazildi. Shuningdek, taniqli tadbirkorlar ishtirokida motivatsion treninglar boʻlib oʻtdi.

Tadbir doirasida bir guruh talabalar “Sulton Tex Group” xususiy korxonasida boʻlib, ip yigiruv va yogʻ qadoqlash jarayonlari bilan yaqindan tanishdilar.

Koʻrgazmada “Talaba – kelajak” muloqot maydonchalari, yuzma-yuz suhbatlar, bandlik va ijtimoiy himoya xizmatlari, imtiyozli kreditlar boʻyicha maslahatlar hamda sport musobaqalari tashkil etildi.

Ko‘rgazmaga 11 360 nafar talaba tashrif buyurib, ulardan 3 748 nafari ish beruvchilar bilan suhbat o‘tkazdi. Natijada 1 274 nafar talaba uchun ish joyi aniqlandi, 49 nafar talaba esa o‘z biznes loyihalarini taqdim etib, tadbirkorlik faoliyatiga yo‘naltirildi.

“TalabaEXPO – 2025” kasb koʻrgazmasi yakunida esa talabalar uchun bayramona konsert dasturi namoyish etildi.