O‘zbekiston Respublikasi Oliy taʼlim, fan va innovatsiyalar vazirligi

1-oktyabr kuni Sukuba xalqaro kongress markazida start olgan nufuzli anjumanda sanoat, davlat boshqaruvi va akademik doiralari vakillari jahonning dolzarb muammolarini muhokama qilish, fan va texnologiya orqali yechim topish hamda tadqiqotchilar va mutaxassislar o‘rtasida samarali aloqalar o‘rnatish maqsadida to‘planishdi. Ochilish marosimida Sukuba universiteti rektori va Sukuba konferensiyasi qo‘mitasi raisi Nagata Kiosuke global tahdidlar – qashshoqlik, qurg‘oqchilik, xalqaro nizolar va yuqumli kasalliklarni tilga olib, ularga yechim topishda fan va jamiyat hamkorligining ahamiyatini ta’kidladi. Shuningdek, Yaponiya ta’lim, madaniyat, sport, fan va texnologiyalar vaziri Abe Toshiko hamda Ibaraki prefekturasi gubernatori Oigava Kazuxiko videomurojaat yo‘lladilar. Plenar sessiyada Yaponiya Milliy qishloq xo‘jaligi va oziq-ovqat tadqiqotlari tashkiloti (NARO) prezidenti Kyuma Kazuo, NVIDIA kompaniyasi vitse-prezidenti va Yaponiya bo‘yicha menejeri Osaki Masataka, Jahon yoshlar akademiyasi hamraisi Yensi Flores-Bueso ma’ruza qildi. O‘zbekiston Respublikasi oliy ta’lim, fan va innovatsiyalar vaziri Qo‘ng‘irotboy Sharipov boshchiligidagi delegatsiya ham mazkur anjumanda ishtirok etmoqda. Vazir o‘z nutqida mamlakatimizda oliy ta’lim va ilm-fan sohasida amalga oshirilayotgan keng ko‘lamli islohotlar, universitetlar mustaqilligini kuchaytirish, xalqaro hamkorlikni kengaytirish, ustuvor yo‘nalishlarda ilmiy salohiyatni yuksaltirish borasidagi ishlar haqida to‘xtaldi. "Biz nafaqat milliy muammolarni hal qiladigan, balki global innovatsiya ekotizimlariga munosib hissa qo‘shadigan kreativ avlodni tarbiyalashni maqsad qilganmiz. Shu bois xalqaro tajriba almashish, qo‘shma tadqiqotlar olib borish, akademik mobillik va yoshlar startaplarini qo‘llab-quvvatlashga alohida e’tibor qaratamiz", – dedi vazir. "Sukuba konferensiyasi – 2025"da shuningdek Nobel mukofoti sovrindorlari – Singapur milliy universiteti professori Kostya Novosyolov va Prinston universiteti professori F. Dunkan Haldeyn, shuningdek, Kioto universiteti professori Kazutosi Mori, Kaliforniya universiteti professori Bonifas Fokva, Tokio va Toxoku universitetlari olimlari, nufuzli korporatsiyalar rahbarlari hamda Yaponiyaning yetakchi ilmiy muassasalari vakillari ishtirok etmoqda. Anjuman 1–3-oktyabr kunlari davom etib, 35 ta sessiya va tadbirlarni o‘z ichiga oladi. Ular orasida nufuzli ilmiy mukofot sohiblari bilan muloqotlar va dunyo universitetlari hamda ilmiy muassasalarining yosh tadqiqotchilari chiqishlari ham nazarda tutilgan.