Kasbiy ta’lim sifatini oshirish maqsadida texnikumlardagi imkoniyatlar ko‘zdan kechirildi
2025-09-27 15:00:00 / Vazirlik yangiliklari
Jumladan, Sergeli tuman politexnikumida olib borilgan o‘rganish chog‘ida ta’lim muassasasi binolari va infratuzilmasi ko‘zdan kechirildi. Xususan, oshpazlik ustaxonasi, avtomobillarga xizmat ko‘rsatish o‘quv xonalari, tikuvchilik amaliyoti xonalarida bo‘yicha yaratilgan imkoniyatlar bilan tanishildi. Mazkur shart-sharoitlar o‘quvchilarning nazariy bilimlari bilan birga amaliy ko‘nikmalarini mustahkamlashga xizmat qilayotgani qayd etildi.
Shuningdek, Toshkent turizm va madaniy meros texnikumi faoliyati bilan ham tanishildi. TIKA hamkorligida tashkil etilgan mehmonxona xizmatiga ixtisoslashgan amaliyot xonasi, turli o‘quv xonalari, restoran-bar hamda oshpazlik ustaxonalari ko‘rib chiqildi. Ushbu infratuzilma yoshlarni turizm va xizmat ko‘rsatish sohasiga tayyorlashda muhim ahamiyat kasb etishi ta’kidlandi.
Texnikum o‘quvchilari bilan suhbat jarayonida ularning amaliyoti masalasi ham alohida muhokama qilindi. Yoshlarning nazariy bilimlarini amaliyot bilan uyg‘unlashtirish, ularning ishlab chiqarish korxonalarida tajriba orttirishini ta’minlash, shu orqali mehnat bozori talablariga tayyor holda kasb egallashlari uchun zarur sharoit yaratish muhimligi ta’kidlandi.
Tashrif davomida ta’lim muassasalaridagi mavjud muammolar, ularni bartaraf etish choralari ham muhokama qilindi. Jumladan, kasbiy ta’lim tashkilotlarida kadrlar tayyorlash jarayoniga xalqaro hamkorlar va ish beruvchilarni keng jalb etish, jamoatchilikni yoshlarning kasb egallash imkoniyatlaridan kengroq boxabar etish, ularning amaliy ko‘nikmalarini bozor talablari asosida rivojlantirish masalalariga alohida e’tibor qaratildi.
O‘rganish natijalari asosida ta’lim sifatini yanada oshirish, amaliy mashg‘ulotlarni samarali tashkil etish hamda texnikum bitiruvchilarini mehnat bozori talablariga mos yuqori malakali kadr sifatida tayyorlash bo‘yicha aniq vazifalar belgilab olindi.