Oliy va kasbiy ta’lim muassasalarida kuz-qish mavsumiga tayyorgarlik masalalari muhokama qilindi
2025-09-26 10:05:00 / Vazirlik yangiliklari
Unda ta’lim tashkilotlari rahbarlari, prorektorlar, talabalar turar joylari mas’ullari hamda tyutorlar videokonferensiya aloqasi orqali ishtirok etdi. Yig‘ilish davomida ta’lim muassasalarining 2025/2026-o‘quv yili kuz-qish mavsumiga tayyorgarlik ko‘rish va uni betalofat o‘tkazish bo‘yicha amalga oshiriladigan ishlar, mavjud muammolar va ularni bartaraf etish choralari tanqidiy tahlil qilindi.
Qayd etilganidek, bugungi kunda oliy ta’lim muassasalarida jami 1 323 ta bino va inshoot, jumladan, 574 ta o‘quv binosi, 385 ta talabalar turar joyi va boshqa yordamchi obyektlar faoliyat yuritmoqda. Ushbu obyektlarda belgilangan reja asosida kapital va joriy ta’mirlash ishlari yakuniga yetkazilgan. Shuningdek, ta’lim muassasalariga ajratilgan 33,7 ming tonna ko‘mir yoqilg‘isining 99,7 foizi hududlarga yetkazildi.
Biroq, ayrim ta’lim muassasalarida issiqlik tizimlari, tom qoplamalari va derazalarni yangilash, shuningdek, energiya samaradorligini oshirish bo‘yicha bajarilishi lozim bo‘lgan vazifalarda kamchiliklar aniqlangan. Masalan, rejalashtirilgan 69 ming kv.m bazalt qoplamaning 85 foizi, quyosh panellari o‘rnatish bo‘yicha belgilangan 5 075 kVt quvvatdan 75,5 foizi amalga oshirilgan, ayrim oliy va kasbiy ta’lim muassasalarida esa bu ishlarga umuman start berilmagan.
Yig‘ilishda vazir Qo‘ng‘irotboy Sharipov barcha ta’lim muassasalari rahbarlaridan 1-oktyabrgacha kuz-qish mavsumiga tayyorgarlikni to‘liq yakunlashni, mavjud muammolarni o‘z vaqtida bartaraf etishni va talabalar uchun zarur sharoitlarni ta’minlashni qat’iy talab qildi.
Kuz-qish mavsumiga tayyorgarlik jarayonida “Hududiy elektr tarmoqlari”, “O‘ztransgaz”, “O‘zenergoinspeksiya” kabi tashkilotlarning hududiy bo‘linmalari bilan yaqin hamkorlikni yo‘lga qo‘yish zarurligi alohida qayd etildi.
Shuningdek, talabalar yotoqxonalari hamda ijarada yashovchi talabalar holatidan muntazam xabardor bo‘lib turish, ularni ta’lim jarayonlariga to‘laqonli integratsiya qilish bo‘yicha vazifalar belgilab berildi.
Yakunda vazirlik huzuridagi ishchi guruh va hududiy mas’ullarga kuz-qish mavsumida ta’lim muassasalarining barqaror faoliyatini ta’minlash bo‘yicha aniq topshiriqlar berildi.