Oʻzbekiston va Gretsiya oliy taʼlim sohasida hamkorlik imkoniyatlari muhokama qilindi
2025-09-25 18:00:00 / Vazirlik yangiliklari
Maʼlumki, Toshkent davlat texnika universiteti va Afina texnologik oʻquv instituti, shuningdek, Andijon mashinasozlik instituti hamda Gʻarbiy Attika universiteti oʻrtasida hamkorlik toʻgʻrisidagi hujjatlar imzolangan. Grek professor va mutaxassislarining yurtimiz oliygohlarida maʼruza va dars jarayonlarida ishtirok etishi hamkorlikning muhim yoʻnalishi sifatida qayd etildi. Shu bilan birga, universitetlar Yevropa Ittifoqining “Erasmus+” dasturi doirasida samarali ish olib bormoqda.
Uchrashuvda taʼkidlanganidek, Gretsiya innovatsiya dasturlari va ilmiy-tadqiqot salohiyati jihatdan yuqori natijalarga erishgan. Taʼlimga ajratilayotgan mablagʻlar, xalqaro reytinglardagi oʻrni va milliy innovatsiya koʻrsatkichlari mamlakatning bu sohadagi imkoniyatlarini namoyon etmoqda.
Muzokaralar davomida universitetlar oʻrtasida yangi memorandum va kelishuvlar imzolash, talabalar va professor-oʻqituvchilar almashinuvini tizimli yoʻlga qoʻyish, qoʻshma ilmiy-tadqiqot laboratoriyalari va markazlari faoliyatini tashkil etish kabi masalalarga urg'u berildi. Tomonlar ushbu tashabbuslar Oʻzbekiston va Gretsiya oʻrtasidagi akademik va ilmiy hamkorlikni yangi bosqichga olib chiqishiga ishonch bildirdilar.