Vazir talaba, doktorant va prorektorlar uchun taʼlim tizimidagi islohotlar va istiqboldagi rivojlanish masalalari yuzasidan maʼruza qildi
2025-09-24 11:00:00 / Vazirlik yangiliklari
Tadbirni “Ulugʻbek” jamgʻarmasi raisi Oqil Salimov kirish so‘zi bilan ochib, mamlakatimizda yoshlarga yaratilayotgan imkoniyatlar, ularning iqtidor va salohiyatini roʻyobga chiqarish borasida amalga oshirilayotgan ishlar hamda jamgʻarmaning bu jarayondagi oʻrni haqida toʻxtalib oʻtdi.
Maʼruzada oliy taʼlim tashkilotlarining oʻquv ishlari boʻyicha prorektorlari, kasbiy taʼlim muassasalari direktorlari va oʻrinbosarlari ishtirok etdi. Toshkent shahridagi oliygoh va kasbiy taʼlim muassasalari rahbarlari shaxsan, hududlardagi taʼlim muassasalari esa ZOOM platformasi orqali qatnashdilar.
Vazirning maʼruzasi Oʻzbekiston Respublikasi Prezidentining oʻqituvchi va murabbiylar bilan uchrashuvida belgilangan ustuvor vazifalar hamda takdimot materiallari asosida boʻlib, unda oliy va kasbiy taʼlim tizimlarida amalga oshiriladigan yangiliklar, islohotlar va ustuvor yoʻnalishlar atroflicha yoritildi.
Xususan, kasbiy taʼlimda “2026-yil – yoshlarni zamonaviy kasb-hunarga oʻrgatish yili” doirasida yangi dasturlarni amalga oshirish, xalqaro standartlar asosida taʼlim berish, dual taʼlimni kengaytirish, texnikum va ishlab chiqarish korxonalari hamkorligini kuchaytirish masalalariga alohida toʻxtalib oʻtildi.
Oliy taʼlim sohasida esa Oʻzbekistonni mintaqaviy taʼlim va ilm-fan markaziga aylantirish, oliygohlarning xalqaro reytinglardagi oʻrnini mustahkamlash, qoʻshma dasturlarni keng yoʻlga qoʻyish, xorijiy oliygohlar filiallarini ochish, taʼlim eksport hajmini oshirish kabi ustuvor vazifalar belgilab berildi.
Shu bilan birga, pedagoglarni qoʻllab-quvvatlashga qaratilgan tashabbuslar, oliygoh bitiruvchilarining bandligini taʼminlashda yangi mexanizmlarni joriy etish hamda rektorlar vakolatini kengaytirish masalalari ham muhokama qilindi.