Toshkentda “Kasbiy ta’lim kuni” tadbiri o‘tkazildi
2025-09-19 15:10:00 / Vazirlik yangiliklari
Tadbirda Oliy ta’lim, fan va innovatsiyalar vaziri Qo‘nig‘irotboy Sharipov, Germaniya elchisi Manfred Huterer, Shveysariya elchisi Konstantin Obolenskiy hamda YuNESKO vakolatxonasi rahbari Sara Noshadi, shuningdek, kasbiy ta’lim tashkilotlari mas’ullari, o‘quvchilar ishtirok etdi.
Tadbir doirasida kasb-hunar ta’lim muassasalari, xususiy sektor va xalqaro tashkilotlar axborot stendlari, yoshlar va oilalar uchun o‘yinlar, viktorinalar hamda amaliy mashg‘ulotlar tashkil etildi.
Tadbirda Oliy ta’lim, fan va innovatsiyalar vaziri Qo‘nig‘irotboy Sharipov so‘zga chiqib, yaqinda davlatimiz rahbari raisligida o‘tkazilgan yig‘ilishda kasbiy ta’lim masalalariga alohida urg‘u qaratilganini ta’kidladi. Jumladan, bir yil yoshlarni kasb-hunarga o‘rgatish yili bo‘lishi, shuningdek, Kasbiy ta’lim agentligi tashkil etilishi ushbu yo‘nalish mamlakatimiz taraqqiyoti uchun qanchalik dolzarb va ustuvor ekanining yaqqol dalili sifatida qayd etildi.
Bugungi kunda kasbiy ta’lim sohasida amalga oshirilayotgan keng qamrovli islohotlar, o‘quv dasturlarini zamon talablariga moslashtirish, malakali mutaxassislarni tayyorlash hamda xalqaro tashkilotlar bilan yo‘lga qo‘yilgan hamkorlik aloqalariga ham alohida to‘xtalib o‘tildi.
Ayni vaqtda, O‘zbekistonda kasbiy ta’lim sohasini qo‘llab quvvatlashga qaratilgan YuNESKO, Germaniya xalqaro hamkorlik jamiyati (GIZ), Shveysariyaning Xelvetas tashkilotlari bilan hamkorlikda loyihalar amalga oshirilmoqda.
Germaniyaning “bsw” kompaniyasi bilan tibbiyot va turizm sohasida kadrlarni tayyorlash yo‘lga qo‘yildi.
Germaniya taraqqiyot banki (KfW) ishtirokida 49,02 mln yevrolik “Kasbiy ta’lim tizimini takomillashtirish” loyihasi boshlandi.
Loyiha doirasida 8 ta texnikumda tibbiyot, konchilik, arxitektura-qurilish, energetika, yengil sanoat va transport yo‘nalishlari bo‘yicha Germaniya tajribasi asosida kadrlar tayyorlaydigan Ilg‘or kasbiy tayyorgarlik markazlari tashkil etiladi.
Mazkur tashabbus yoshlarda kasbiy ta’limga qiziqishni oshirish, amaliy ko‘nikmalarni rivojlantirish va ish beruvchilar bilan hamkorlikni kuchaytirishga xizmat qilishi ta’kidlandi.