Vazir Namangan davlat texnika universitetida DXSH asosida qurilgan yangi talabalar turarjoyi bilan tanishdi
2025-09-17 18:00:00 / Vazirlik yangiliklari
1000 o‘ringa mo‘ljallangan mazkur yirik inshoot "Nifrit Impeks" MCHJ va universitet hamkorligida qurildi. Loyiha qiymati 74,8 mlrd so‘mni tashkil etdi. Shu jumladan, Respublika byudjetidan 30 mlrd so‘m subsidiya, qolgan 44,8 mlrd so‘m xususiy sherik mablag‘lari hisobidan moliyalashtirildi.
Zamonaviy turarjoy talabalar uchun qulay xonalar, o‘quv zali, kutubxona, internet va kompyuter xonalari, dam olish hududlari hamda maishiy xizmat inshootlari bilan ta’minlangan. Shu bilan birga, sport va madaniy-ma’rifiy tadbirlar o‘tkazish uchun keng sharoit yaratilgan. Xususan, turarjoy hududida zamonaviy stadion ham qurilib, yoshlar uchun sog‘lom turmush tarzini ta’minlash imkoniyati yaratildi.
Qurilish ishlari to‘liq yakunlanib, turarjoy foydalanishga topshirildi. Shu haftadan boshlab talabalar yangi turarjoyga qabul qilinadi.
Vazir o‘z tashrifi davomida obyektda yaratilgan sharoitlarni yuqori baholab, talabalarning sifatli ta’lim olishi va samarali dam olishi uchun bu kabi zamonaviy turarjoylarni barpo etish muhim ahamiyat kasb etishini ta’kidladi.