“Yashil iqtisodiyot uchun kasbiy ta’limni modernizatsiya qilish” loyihasi muhokama qilindi
2025-09-16 14:40:00 / Vazirlik yangiliklari
Muloqotda OTBning Janubi-Sharqiy Osiyo bo‘yicha departamenti tarkibidagi Inson va ijtimoiy rivojlanish sektori katta direktori Ayako Inagaki, shuningdek, mazkur sektor direktori Sofiya Shakil qatnashdi.
Uchrashuvda asosiy e’tibor “Yashil iqtisodiyot uchun kasbiy ta’limni modernizatsiya qilish” loyihasiga qaratildi. Loyiha Prezident farmonlari va “O‘zbekiston–2030” strategiyasi bilan uyg‘unligi, shuningdek, yashil iqtisodiyotga o‘tish bo‘yicha milliy dasturlar doirasidagi ahamiyati ta’kidlandi.
Muhokamalarda 90 ta kasbiy ta’lim muassasasi, Farg‘ona va Buxoro davlat texnika universitetlari hamda Qo‘qon erkin iqtisodiy zonasini qamrab olish, OTB tomonidan taqdim etiladigan imtiyozli kredit va milliy mablag‘lar hisobidan ta’lim muassasalari moddiy-texnik bazasini yangilash, o‘qituvchilarni qayta tayyorlash va malakasini oshirish, dual ta’lim tizimini joriy etish hamda xalqaro akkreditatsiya jarayonlarini qo‘llab-quvvatlash kabi masalalari muhokama qilindi.
Uchrashuv yakunida OTB delegatsiyasi hamkorlikda olib borilayotgan loyihalarni amalga oshirishda vazirlik ko‘magini ijobiy baholadi. Shuningdek, tomonlar hamkorlikni izchil davom ettirish va belgilangan vazifalarni bosqichma-bosqich amalga oshirishga kelishib oldilar.