O‘zbekiston va Vengriya o‘rtasida ta’lim, fan va innovatsiya sohalarida hamkorlik so‘nggi yillarda yangi bosqichga ko‘tarildi
2025-09-12 09:05:00 / Vazirlik yangiliklari
2017-yilda imzolangan ta’lim, fan va madaniyat sohasidagi bitim ikki mamlakat universitetlari o‘rtasida bevosita aloqalar o‘rnatish, qo‘shma tadqiqotlar olib borish va talabalar almashinuvini kengaytirish uchun mustahkam poydevor yaratdi.
2025-yil 10-sentyabr kuni Oliy ta’lim, fan va innovatsiyalar vaziri Qo‘ng‘irotboy Sharipov Vengriya davlat kotibi o‘rinbosari Marton Ugroshdi bilan uchrashdi. Unda ikki davlat o‘rtasidagi oliy ta’lim, fan va innovatsiya sohasidagi hamkorlik va kelgusidagi rejalar muhokama qilindi.
Muloqot avvalida Vengriya Bosh vaziri Viktor Orbanning taklifiga binoan, 2025-yil 20-may kuni Prezident Shavkat Mirziyoyevning Vengriyaga tashrifi doirasida ilm-fan va innovatsiyalar sohasida hamkorlik bo‘yicha idoralararo kelishuv imzolangani ta’kidlandi. Shuningdek, “Stipendium Hungaricum” dasturining samarali davom etayotgani alohida qayd etildi.
Bugungi kunda Vengriya hukumatining “Stipendium Hungaricum” dasturi doirasida o‘zbekistonlik talabalar uchun ajratilayotgan grant o‘rinlari bosqichma-bosqich kengayib bormoqda. Agar 2019-yilda bu ko‘rsatkich 30 ta bo‘lgan bo‘lsa, 2023/2024-o‘quv yiliga kelib, 170 taga yetdi. 2026/2027-yildan esa 200 ta o‘rin ajratilishi rejalashtirilgan.
Universitetlararo hamkorlik ham izchil rivojlanmoqda. 2021-yilda Toshkentda va 2023-yilda Budapeshtda bo‘lib o‘tgan rektorlar forumlari davomida 60 dan ortiq hujjat imzolandi, qo‘shma loyihalar yo‘lga qo‘yildi. Joriy yilning 14–15-oktabr kunlari Xiva shahrida uchinchi forum o‘tkazilishi va yangi dasturlar imzolanishi kutilmoqda.
Shuningdek, startaplar ekotizimi ham hamkorlikning muhim yo‘nalishiga aylandi. Birinchi va ikkinchi tur tanlovlari natijasida IT, sun’iy intellekt, qayta tiklanuvchi energiya va boshqa sohalarda loyihalar moliyalashtirildi. Yaqinda umumiy qiymati 2 million yevroga teng uchinchi tur tanlovi ham yo‘lga qo‘yilishi rejalashtirilgan.
Vengriya hukumati tashabbusi bilan tashkil etilayotgan Turkiy davlatlar madaniyat markazi ham ijtimoiy-ma’naviy aloqalarni mustahkamlashga xizmat qiladi. Markazda o‘zbek tili va madaniyatiga bag‘ishlangan alohida burchak ham tashkil etilishi belgilangan.
Umuman olganda, ta’lim kvotalarining kengayishi, rektorlar forumlari, qo‘shma startaplar va mintaqaviy tashabbuslar O‘zbekiston–Vengriya hamkorligini yangi bosqichga olib chiqmoqda