Oʻzbekiston va Vengriya oliy taʼlim, fan va innovatsiyalar sohasida hamkorlikni rivojlantirmoqda
2025-09-10 19:30:00 / Vazirlik yangiliklari
Uchrashuvda ikki davlat oʻrtasidagi oliy taʼlim, fan va innovatsiyalar sohasidagi hamkorlikning bugungi holati va uni yanada rivojlantirish istiqbollari muhokama qilindi.
Taʼkidlanishicha, Vengriya Oʻzbekiston uchun Yevropadagi muhim strategik sherik boʻlib, mamlakatimiz Yevropa Ittifoqi davlatlari orasida ilk bor Vengriya bilan strategik sheriklik darajasiga koʻtarilgan. Bu soʻnggi yillarda iiki davlat rahbarlarining qatʼiy siyosiy irodasi va amalga oshirilgan izchil chora-tadbirlar samarasidir.
Uchrashuvda “Stipendium Hungaricum” dasturining muvaffaqiyatli amalga oshirilayotgani alohida qayd etildi. Tomonlar, shuningdek, qoʻshma taʼlim dasturlari, ikki diplomli yoʻnalishlar xamda akademik almashinuvlar tashkil etish masalalari yuzasidan ham fikr almashdilar.
Oʻz navbatida, tomonlar joriy yilning 14–15-oktyabr kunlari Xiva shahrida boʻlib oʻtishi rejalashtirilgan uchinchi Oʻzbekiston–Vengriya oliy taʼlim forumiga tayyorgarlik masalalarini ham muhokama qildilar.
Shuningdek, innovatsion texnologiyalar, sunʼiy intellekt va yuqori texnologiya sohalarida qoʻshma tadqiqotlar, startaplarni qoʻllab-quvvatlash, texnopark va inkubatorlar faoliyatida hamkorlikni rivojlantirish istiqbollari koʻrib chiqildi.
Tomonlar mavjud imkoniyatlar va ilmiy-tadqiqot salohiyatidan samarali foydalanish orqali ikki mamlakat aloqalari yanada mustahkamlanishiga ishonch bildiradilar.