O‘zbekiston Respublikasi Oliy taʼlim, fan va innovatsiyalar vazirligi

1-bob. Umumiy qoidalar

1. Ushbu Nizom ijtimoiy ahamiyatga molik loyihalarni amalga oshirish uchun Oliy taʼlim, fan va innovatsiyalar vazirligi (keyingi oʻrinlarda – Vazirlik) tomonidan nodavlat notijorat tashkilotlari va fuqarolik jamiyatining boshqa institutlariga davlat ijtimoiy buyurtmasi berish tartibini belgilaydi.

2. Ushbu Nizom qoidalari Vazirlikning ijtimoiy ahamiyatga molik loyihalarni amalga oshirish uchun nodavlat notijorat tashkilotlariga byudjetdan tashqari mablagʻlar hisobidan bevosita davlat ijtimoiy buyurtmasi berishi bilan bogʻliq munosabatlarga nisbatan tatbiq etiladi.

3. Ushbu Nizomda quyidagi asosiy tushunchalar qoʻllaniladi:

davlat ijtimoiy buyurtmasi – ijtimoiy ahamiyatga molik loyihalarni amalga oshirish uchun Vazirlik hamda nodavlat notijorat tashkilotlari oʻrtasida davlat ijtimoiy buyurtmasi amalga oshirish shartnomasini tuzish orqali ishlarni bajarish yoki tadbirlar oʻtkazishga qaratilgan davlat topshirigʻi;

ijtimoiy ahamiyatga molik loyiha (keyingi oʻrinlarda – loyiha) – sotsial
va ijtimoiy foydali maqsadlarga erishishga qaratilgan hamda davlat ijtimoiy buyurtmasi amalga oshirish shartnomasida belgilangan muddatlarda bajariladigan tashkiliy, iqtisodiy
va boshqa shakldagi chora-tadbirlar majmuini oʻz ichiga olgan loyiha;

davlat ijtimoiy buyurtmalarini berish boʻyicha tanlov (keyingi oʻrinlarda – tanlov) – ijtimoiy ahamiyatga molik loyihalarni amalga oshirish uchun talabgor sifatida ishtirok etayotgan bir nechta nodavlat notijorat tashkilotlaridan olingan takliflarni taqqoslash asosida davlat ijtimoiy buyurtmasini berishning raqobatli usuli;

Vazirlik huzuridagi Jamoatchilik kengashi – Oliy taʼlim, fan va innovatsiyalar vazirligi huzurida faoliyat yurituvchi, loyihalarni koʻrib chiqish, baholash va monitoring qilish vakolatiga ega jamoatchilik organi.

4. Davlat ijtimoiy buyurtmasi quyidagi yoʻnalishlar boʻyicha amalga oshiriladi:

Oliy taʼlim tizimini rivojlantirish va sifatini oshirish;

Ilmiy tadqiqot ishlarini qoʻllab-quvvatlash;

Innovatsiyalarni joriy etish va tarqatish;

Taʼlim jarayonini raqamlashtirish;

Yosh olimlar va talabalarning ilmiy loyihalarini qoʻllab-quvvatlash;

Inklyuziv taʼlimni rivojlantirish;

Taʼlim infratuzilmasini rivojlantirish.

5. Vazirlikka nodavlat notijorat tashkilotlaridan kelib tushgan loyihalarni koʻrib chiqish, umumlashtirish, baholash hamda nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligini aniqlash Vazirlik huzuridagi Jamoatchilik kengashi (keyingi oʻrinlarda – jamoatchilik kengashi) tomonidan aniqlanadi.

Vazirlik tomonidan har yili ijtimoiy ahamiyatga molik loyihalarni amalga oshirish uchun nodavlat notijorat tashkilotlariga byudjetdan tashqari mablagʻlar hisobidan bevosita davlat ijtimoiy buyurtmasini berish boʻyicha tanlovlar tashkil etiladi hamda oʻzining byudjetdan tashqari mablagʻlari xarajatlari smetasida bevosita davlat ijtimoiy buyurtmasini berish uchun ajratiladigan mablagʻlar miqdori nazarda tutiladi.

Vazirlik tomonidan bitta davlat ijtimoiy buyurtmasini bajarish uchun bazaviy hisoblash miqdorining olti ming baravarigacha boʻlgan miqdorda mablagʻ ajratilishi mumkin.

2-bob. Tanlov oʻtkazish orqali davlat ijtimoiy buyurtmasini berish tartibi

6. Ijtimoiy ahamiyatga molik loyihalarni amalga oshirish uchun Vazirlik tomonidan tanlov oʻtkazish orqali davlat ijtimoiy buyurtmasi ushbu Nizomga 1-ilovaga muvofiq sxema boʻyicha beriladi.

7. Vazirlik tomonidan davlat ijtimoiy buyurtmalarini berish uchun tanlov oʻtkazilishi toʻgʻrisidagi eʼlon tanlov boʻyicha hujjatlar loyihalarni qabul qilish muddati tugaydigan sanadan kamida oʻn ikki ish kuni va koʻpi bilan oʻttiz ish kunidan oldin Vazirlikning rasmiy veb-sayti, ijtimoiy tarmoqlariga joylashtiriladi.

8. Tanlov oʻtkazilishi toʻgʻrisidagi eʼlon quyidagi axborotlarni oʻz ichiga oladi:

tanlov tashkilotchisining nomi va manzili;

davlat ijtimoiy buyurtmasining tavsifi;

davlat ijtimoiy buyurtmasini mablagʻ bilan taʼminlash manbalari va miqdori;

davlat ijtimoiy buyurtmasini bajarish muddati;

ishtirokchilarga qoʻyiladigan talablar (shartnoma tuzish huquqiga egalik, soliqlar
va yigʻimlarni toʻlash boʻyicha muddati oʻtgan qarzdorlikning, oʻziga nisbatan joriy etilgan bankrotlik holatining mavjud emasligi, insofsiz ijrochilarning yagona reestrida qayd etilmaganligi);

ishtirokchilar bilan bogʻlanish uchun Vazirlikning belgilangan bir yoki bir nechta mas’ul xodimlari familiyasi, ismi, otasining ismi, lavozimi va manzili;

tanlov ishtirokchilari tomonidan loyihalarni berish muddati tugaydigan sana va vaqt;

loyihalarni rasmiylashtirishga doir talablar;

tanlov gʻolibi bilan hisob-kitoblarni amalga oshirish tartibi haqidagi axborot;

tanlovda ishtirok etish uchun loyihalarni davlat tilida va zaruratga qarab, boshqa tillarda tayyorlash majburiyligi toʻgʻrisidagi talab;

loyihalarni baholash mezonlari va koʻrib chiqish tartibi;

tanlov ishtirokchilari tomonidan korrupsiya koʻrinishlariga yoʻl qoʻymaslik boʻyicha ariza taqdim etish majburiyligi haqidagi talablar.

Tanlov oʻtkazish toʻgʻrisidagi eʼlon qonunchilikka zid boʻlmagan boshqa axborotlarni ham oʻz ichiga olishi mumkin.

9. Davlat ijtimoiy buyurtmasi boʻyicha bir necha nodavlat notijorat tashkiloti qoʻshma guruh tuzgan holda umumiy ariza berishlari mumkin. Bunda ularning har birining funksiyalari, bir-biriga nisbatan javobgarligi va loyihani amalga oshirishga qoʻshayotgan hissalari ko‘rsatilishi lozim.

10. Tanlovda ishtirok etish uchun ariza va unga ilova qilinadigan hujjatlar Vazirlikka ariza beruvchi tomonidan bevosita, pochta orqali yoki elektron koʻrinishda taqdim etilishi mumkin.

3-bob. Tanlov shartlari va uni oʻtkazish tartibi

11. Tanlovda nodavlat notijorat tashkilotlari ishtirok etishlari mumkin, siyosiy partiyalar, kasaba uyushmalari va diniy tashkilotlar bundan mustasno.

12. Tanlovda ishtirok etish uchun nodavlat notijorat tashkilotlari quyidagi hujjatlarni elektron shaklda maxsus axborot resursi orqali Vazirlikka taqdim etadi.

ushbu Nizomga 2-ilovaga muvofiq shakldagi tanlovda ishtirok etish haqida ariza;

davlat ijtimoiy buyurtmasini bajarishning batafsil tasnifi;

davlat roʻyxatidan oʻtganlik haqidagi guvohnoma nusxasi;

nodavlat notijorat tashkiloti ustavining nusxasi;

qarzdorlik mavjud emasligi haqida davlat soliq inspeksiyasi tomonidan taqdim etilgan maʼlumotnoma;

maxsus ruxsatnoma (litsenziya) nusxasi, agar davlat ijtimoiy buyurtmasi doirasidagi loyihalarni amalga oshirish uchun maxsus ruxsatnoma (litsenziya) talab etilsa.

Nodavlat notijorat tashkilotining tashabbusi bilan boshqa hujjatlar (sertifikatlar, oʻtkazilgan tekshirishlar boʻyicha maʼlumotlar va shu kabilar) ham taqdim qilinishi mumkin.

13. Tanlov gʻolibi nodavlat notijorat tashkilotlari tomonidan tanlovga taqdim etilgan loyihalarni oʻn ish kuni ichida koʻrib chiqish, umumlashtirish va ularni baholash natijalariga koʻra aniqlanadi.

Agar Vazirlik jamoatchilik kengashi aʼzosi tanlovga loyiha taqdim etgan nodavlat notijorat tashkilotiga aloqador (nodavlat notijorat tashkiloti vakili (xodimi), rahbar organlarining aʼzosi yoki ularning yaqin qarindoshi) boʻlsa, ushbu loyihani koʻrib chiqish, umumlashtirish va baholash jarayonida jamoatchilik kengashi yig‘ilishi ishtirokchilari tarkibidan ixtiyoriy chiqadi yoki jamoatchilik kengashi aʼzolari tomonidan majburan chetlashtiriladi.

14. Oʻtkazilayotgan tanlov doirasida loyihalarni baholashda Vazirlik jamoatchilik kengashi tomonidan tasdiqlangan ijtimoiy ahamiyatga molik loyihalarni baholash metodikasidan (keyingi oʻrinlarda – Baholash metodikasi) foydalaniladi.

15. Loyihani oʻrganish natijalariga koʻra jamoatchilik kengashi aʼzolari har bir loyiha boʻyicha baholash mezonlariga muvofiq baholash varaqasiga ballar qoʻyadi.

Baholash varaqalaridagi ballar hisoblab chiqilib, eʼlon qilinadi.

Tanlov natijasiga koʻra eng koʻp ball olgan ishtirokchi tanlovda gʻolib deb topiladi.

16. Tanlov natijasiga koʻra ishtirokchilarning ballari teng boʻlgan taqdirda ular oʻrtasida ushbu Nizomda belgilangan tartib asosida qayta tanlov oʻtkaziladi.

17. Tanlov natijalari tanlov gʻolibi aniqlangan kundan soʻng bir ish kuni ichida Jamoatchilik kengashi qarori bilan tasdiqlanadi. Jamoatchilik kengashi qarorlari bayonnomalar bilan rasmiylashtiriladi. Jamoatchilik kengashining yigʻilishi bayonnomasi Jamoatchilik kengashi kotibi tomonidan yuritiladi va Jamoatchilik kengashi raisi, kotibi va ishtirok etgan barcha aʼzolar tomonidan imzolanadi.

4-bob. Toʻgʻridan toʻgʻri shartnoma tuzish orqali davlat ijtimoiy buyurtmasini berish tartibi

18. Ijtimoiy ahamiyatga molik loyihalarni amalga oshirish uchun davlat organlari tomonidan toʻgʻridan toʻgʻri shartnoma tuzish orqali davlat ijtimoiy buyurtmasi ushbu Nizomga 3-ilovaga muvofiq sxema boʻyicha beriladi.

19. Nodavlat notijorat tashkilotlari (siyosiy partiyalar, kasaba uyushmalari va diniy tashkilotlar bundan mustasno) oliy taʼlim, fan va innovatsiyalar sohalarida mavjud muammolarning taʼsirchan yechimini nazarda tutuvchi tashabbusli loyihalarni amalga oshirish uchun davlat ijtimoiy buyurtmasini olish toʻgʻrisida Vazirlikka ushbu Nizomga 4-ilovaga muvofiq shakldagi loyiha taklifini kiritadi.

20. Loyiha taklifiga quyidagi hujjatlar ilova qilinadi:

davlat ijtimoiy buyurtmasining zarurati va uni bajarishning batafsil tasnifi;

davlat roʻyxatidan oʻtganlik haqidagi guvohnoma nusxasi;

nodavlat notijorat tashkiloti ustavi (nizomi)ning nusxasi;

qarzdorlik mavjud emasligi haqida davlat soliq inspeksiyasi tomonidan taqdim etilgan maʼlumotnoma;

maxsus ruxsatnoma (litsenziya) nusxasi, agar davlat ijtimoiy buyurtmasi doirasidagi loyihalarni amalga oshirish uchun maxsus ruxsatnoma (litsenziya) talab etilsa.

Nodavlat notijorat tashkilotining tashabbusi bilan boshqa hujjatlar (sertifikatlar, oʻtkazilgan tekshirishlar boʻyicha maʼlumotlar va boshqalar) ham taqdim qilinishi mumkin.

21. Jamoatchilik kengashi kiritilgan loyiha taklifini oʻn ish kuni ichida quyidagi mezonlar asosida koʻrib chiqadi va baholaydi:

davlat ijtimoiy buyurtmasini olish toʻgʻrisidagi loyiha taklifining Vazirlik faoliyatining ustuvor yoʻnalishlariga muvofiqligi;

oliy taʼlim, fan va innovatsiyalar sohalaridagi mavjud muammolarning dolzarbligi va aniq yoritilganligi;

muammolarning taʼsirchan yechimi boʻyicha takliflarning ilmiy asoslanganligi, samaradorligi va noyobligi;

loyiha taklifini amalga oshirish xarajatining asoslantirilganligi;

nodavlat notijorat tashkilotining taqdim qilgan loyiha taklifini amalga oshirish qobiliyati.

Loyiha taklifi jamoatchilik kengashi tomonidan har bir mezon boʻyicha “1” balldan “5” ballgacha baholanadi.

Toʻplangan ballar jami ballning 81 foizidan yuqorisini tashkil etsa, taklif ijobiy baholangan deb topiladi.

22. Loyiha taklifi jamoatchilik kengashi tomonidan ushbu Nizomning 21-bandidagi har bir mezon boʻyicha ijobiy baholangan taqdirda, bir ish kuni ichida uning tashabbuskoriga davlat organining byudjetdan tashqari mablagʻlari hisobidan bazaviy hisoblash miqdorining ming baravarigacha miqdorda toʻgʻridan toʻgʻri shartnoma tuzish orqali ijtimoiy buyurtma berilishi toʻgʻrisida jamoatchilik kengashining qarori qabul qilinadi.

23. Jamoatchilik kengashi qarori bayonnoma bilan rasmiylashtiriladi. Jamoatchilik kengashining yigʻilishi bayonnomasi jamoatchilik kengashi kotibi tomonidan yuritiladi va jamoatchilik kengashi raisi, kotibi va ishtirok etgan barcha aʼzolar tomonidan imzolanadi.

5-bob. Davlat ijtimoiy buyurtmasini amalga oshirish shartnomasini tuzish

24. Davlat ijtimoiy buyurtmasini beruvchi davlat organi va nodavlat notijorat tashkiloti oʻrtasida Jamoatchilik kengashining qarori qabul qilingan kundan eʼtiboran oʻn ish kuni ichida davlat ijtimoiy buyurtmasini bajarish shartnomasi tuziladi.

Shartnomada davlat ijtimoiy buyurtmasini beruvchi Vazirlik va nodavlat notijorat tashkilotining huquq va majburiyatlarini hamda javobgarligini belgilab beriladi.

Shartnoma toʻgʻrisidagi axborot Vazirlik tomonidan maxsus axborot resursiga shartnoma tuzilgan kundan boshlab uch ish kunidan kechiktirmay joylashtiriladi.

25. Shartnoma quyidagi qoidalarni oʻz ichiga olgan boʻlishi kerak:

davlat ijtimoiy buyurtmasining maqsadi;

davlat ijtimoiy buyurtmasini amalga oshirish muddatlari;

davlat ijtimoiy buyurtmasiga ajratilgan mablagʻlar miqdori;

mablagʻ bilan taʼminlash muddatlari;

davlat ijtimoiy buyurtmasiga ajratilgan mablagʻlardan maqsadli foydalanganlik yuzasidan nazorat shakllari;

hisobotlar berish muddatlari va shakllari.

26. Agar tanlovda gʻolib deb topilgan nodavlat notijorat tashkiloti shartnomani imzolashdan bosh tortsa yoki tanlovni oʻtkazish davomida oʻz faoliyatini tugatgan boʻlsa, tugatish, qayta tashkil etish jarayonida boʻlsa yoki qonunchilikda belgilangan tartibda bankrot deb eʼtirof etilgan boʻlsa, Vazirlik tanlovda ishtirok etgan va yuqori baho olgan keyingi ishtirokchiga shartnomani imzolashni taklif etishga haqli.

6-bob. Davlat ijtimoiy buyurtmasini bajarishga ajratilgan mablagʻlardan maqsadli foydalanilishini monitoring qilish tartibi

27. Vazirlik davlat ijtimoiy buyurtmasini bajarishga ajratilgan mablagʻlardan maqsadli foydalanilishini shartnomada koʻrsatilgan muddatlarda monitoring qiladi.

Davlat ijtimoiy buyurtmasini bajarishga ajratilgan mablagʻlardan maqsadli foydalanilishini monitoring qilishga auditorlik tashkiloti jalb qilinishi mumkin.

28. Davlat ijtimoiy buyurtmasini olgan nodavlat notijorat tashkiloti davlat ijtimoiy buyurtmasi bajarilishi yakunlangan kundan boshlab besh ish kuni ichida davlat ijtimoiy buyurtmasini bajarish bilan bogʻliq barcha hujjatlarni Vazirlikka taqdim qilishi shart.

29. Vazirlik davlat ijtimoiy buyurtmasini olgan nodavlat notijorat tashkiloti tomonidan taqdim etilgan hujjatlarni ushbu hujjatlar kelib tushgan kundan boshlab bir oy ichida oʻrganadi.

Oʻrganish davomida davlat ijtimoiy buyurtmasini bajarish natijalarining samaradorligi, yaʼni davlat ijtimoiy buyurtmasini bajarishga ajratilgan  mablagʻlarning maqsadli sarflanishi hamda mablagʻlarni ajratishdan koʻzlangan maqsadlarga erishilganligi aniqlanadi.

Oʻrganish natijasi yuzasidan dalolatnoma tuzilib, Vazirlik va davlat ijtimoiy buyurtmasini olgan nodavlat notijorat tashkilot(lar)i rahbar(lar)i tomonidan imzolanadi.

30. Nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligi davlat ijtimoiy buyurtmasini ajratgan davlat organining jamoatchilik kengashi tomonidan ushbu Nizomga 5-ilovaga muvofiq aniqlanadi.

Nodavlat notijorat tashkilotlari tomonidan davlat ijtimoiy buyurtmasini bajarish natijalarining samaradorligini aniqlashdan maqsad davlat ijtimoiy buyurtmasini bajarish uchun ajratilgan mablagʻlarning maqsadli sarflanishi hamda berilgan ijtimoiy buyurtmadan koʻzlangan ijtimoiy maqsadlarga erishilishini tahlil qilishdan iborat.

31. Davlat ijtimoiy buyurtmasi samaradorligining maksimal koʻrsatkichi 30 ballni tashkil etadi.

Davlat ijtimoiy buyurtmasini bajarish natijalarining samaradorligi toʻplagan ballarga qarab aniqlanadi:

yuqori samaradorlik – 25 va undan yuqori ball;

oʻrtacha samaradorlik – 15 balldan 24 ballgacha;

samarasiz – 1 balldan 14 ballgacha.

Davlat ijtimoiy buyurtmasini bajarish natijalariga koʻra yuqori samaradorlikka erishgan nodavlat notijorat tashkiloti davlat ijtimoiy buyurtmasini bergan davlat organi tomonidan byudjetdan tashqari mablagʻlar hisobidan keyingi yillarda oʻtkaziladigan davlat ijtimoiy buyurtmasi tanlovlarida ishtirok etishda taqdim qilgan ijtimoiy loyihasi boʻyicha toʻplangan umumiy ballga ushbu ballning 10 foizi bir martalik imtiyoz sifatida qoʻshib beriladi.

Davlat ijtimoiy buyurtmasini bajarish natijalari samarasiz boʻlgan taqdirda, nodavlat notijorat tashkiloti davlat ijtimoiy buyurtmasini bajarish uchun ajratilgan mablagʻlarning 50 foizini Vazirlik hisobvaraqlariga qaytaradi.

32. Davlat ijtimoiy buyurtmasini bajarishga ajratilgan mablagʻlardan maqsadsiz foydalanilganda, ushbu mablagʻlar Vazirlik hisobvaraqlariga toʻliq qaytarilishi lozim.

7-bob. Yakunlovchi qoidalar

33. Davlat ijtimoiy buyurtmasini bajarishga ajratilgan mablagʻlardan toʻgʻri va maqsadli foydalanish, shuningdek, shartnomada koʻrsatilgan ijtimoiy ahamiyatga molik ishlarni sifatli va oʻz vaqtida bajarish uchun Vazirlik va nodavlat notijorat tashkilotining rahbari javobgar boʻladi.

34. Nodavlat notijorat tashkiloti ushbu Nizom talablari bajarilishiga Vazirlik xodimlarining xatti-harakatlari yuzasidan boʻysunish tartibida yuqori turuvchi organga yoxud bevosita sudga qonunchilik hujjatlarida belgilangan tartibda shikoyat qilishga haqli.

Davlat ijtimoiy buyurtmasini berish tartib-tamoyillari bilan bogʻliq qoidalarning buzilishi boʻyicha nodavlat notijorat tashkilotlarining shikoyatlari “Davlat xaridlari toʻgʻrisida”gi Qonunda belgilangan tartibda koʻrib chiqiladi.

35. Vazirlik tomonidan nodavlat notijorat tashkilotlari va fuqarolik jamiyatining boshqa institutlariga byudjetdan tashqari mablagʻlar hisobidan bevosita davlat ijtimoiy buyurtmasini berish sohasidagi ushbu Nizom bilan tartibga solinmagan munosabatlarga davlat xaridlari toʻgʻrisidagi qonunchilik normalari qoʻllaniladi.