O‘zbekiston Respublikasi Oliy taʼlim, fan va innovatsiyalar vazirligi

Mazkur tadbir davlatimiz rahbarining joriy yil 20-avgust kuni tadbirkorlar bilan o‘tkazilgan ochiq muloqoti davomida berilgan topshiriqlar ijrosini ta’minlash maqsadida tashkil etildi.

Uchrashuvda O‘zbekiston Respublikasi Suv xo‘jaligi vaziri Shavkat Hamrayev, Oliy ta’lim, fan va innovatsiyalar vaziri Qo‘ng‘irotboy Sharipov, universitet rektori Bahodir Mirzayev so‘zga chiqib, ilmiy ishlanmalarni amaliyotga joriy etishning dolzarbligi va samaradorligi haqida fikr bildirdilar.

Shuningdek, xalqaro hamkor tashkilotlar — Xalqaro suv resurslarini boshqarish instituti (IWMI), Orolni qutqarish xalqaro jamg‘armasi, Markaziy Osiyo davlatlararo suv xo‘jaligini muvofiqlashtirish komissiyasi huzuridagi ilmiy-axborot markazi, BMT Taraqqiyot dasturi (UNDP), Germaniya xalqaro hamkorlik jamiyati (GIZ), Koreya xalqaro hamkorlik agentligi (KOICA) va boshqa tashkilotlar vakillari ham tadbirda ishtirok etdilar.

Tadbirda yangi qurilmalar va ishlanmalarni ishlab chiqarishga joriy etish, yangi ish o‘rinlari yaratish, yosh mutaxassislarni ishga jalb qilish bo‘yicha taklif va tashabbuslar ilgari surildi.

Ma’lum qilinishicha, joriy yilda Suv xo‘jaligi vazirligi huzuridagi Irrigatsiya va suv muammolari ilmiy-tadqiqot instituti tomonidan umumiy qiymati 7,3 mlrd so‘mlik 82 ta ilmiy-tadqiqot loyihasi, jumladan, Respublika davlat ilmiy-texnik dasturlari doirasida 30 ta ilmiy-tadqiqot va tajriba-konstruktorlik ishlari amalga oshirilmoqda. Xalqaro moliya institutlari mablag‘lari hisobidan qiymati 308 ming AQSh dollari bo‘lgan 2 ta grant loyihasi bajarilmoqda.

Bundan tashqari, “Agrobank” ATB tomonidan ilmiy-tadqiqot va tajriba-konstruktorlik ishlari qo‘llab-quvvatlanib, umumiy qiymati 4,5 mlrd so‘mlik 6 ta loyiha moliyalashtirilmoqda.

Ochiq muloqot yakunida Suv xo‘jaligi vazirligi, Milliy tadqiqot universiteti, ilmiy va oliy ta’lim muassasalari hamda tadbirkorlar o‘rtasida hamkorlikni kuchaytirish, ishlanmalarni xarid qilish va moliyalashtirish bo‘yicha kelishuvlar hamda shartnomalar imzolandi.

Bundan tashqari tadbir doirasida oliy ta’lim va ilmiy tashkilotlar ilmiy xodimlari tomonidan yaratilgan innovatsion ishlanmalar ko‘rgazmasi namoyish etildi. Unda:

• Toshkent irrigatsiya va qishloq xo‘jaligini mexanizatsiyalash muhandislari instituti — 50 ta,
• Irrigatsiya va suv muammolari ilmiy-tadqiqot instituti — 20 ta,
• “SUVMASH” AJ — 10 ta,
• suv tejovchi sug‘orish tizimlari ishlab chiqaruvchi korxonalar — 50 ta,
• boshqa ilmiy va ta’lim muassasalari — 50 ta ishlanma bilan qatnashdi.