Pedagog xodimlar malakasini oshirish tizimini takomillashtirish masalalari muhokama qilindi
2025-08-20 13:10:00 / Vazirlik yangiliklari
Muhokamada Oliy ta’lim, fan va innovatsiyalar vazirining birinchi o‘rinbosari Shohrux Daliyev boshchiligidagi vazirlik mutasaddilari ham ishtirok etib, oliy va kasbiy ta’lim tashkilotlari, akademik litsey rahbar va pedagog kadrlari malakasini oshirish borasida amalga oshirilayotgan ishlar yuzasidan hisobot berildi.
Qayd etilganidek, bugungi kunda 6 ta institut 5 ta mintaqaviy va 16 ta tarmoq muassasalarida oliy va kasbiy ta’lim tashkilotlari hamda akademik litsey rahbar va pedagog kadrlarning uzluksiz malaka oshirib borishi yo‘lga qo‘yilgan.
Oliy va kasbiy ta’lim tashkilotlari, akademik litseylar rahbar va pedagog kadrlarining malakasini oshirish tizimi to‘liq raqamlashtirilgan. 2023-2025-yillarda 102 tadan ortiq davlat oliy ta’lim tashkilotlarining 26 681 nafar rahbar va pedagog kadrlari 223 ta yo‘nalishda malaka oshirish kurslarida o‘qitilgan.
Tadbirda istiqbolda pedagog xodimlarning malakasini oshirish tizimini yanada optimallashtirish maqsadida oliy va kasbiy ta’lim tashkilotlari hamda akademik litseylarning rahbar va pedagog kadrlarining malakasini oshirishning yagona yaxlit tartibini joriy etish bo‘yicha bir qator takliflar ilgari surildi.
Yakunda amaliy takliflar va chora-tadbirlar rejasi shakllantirish, parlament nazorati mexanizmlari orqali ularning ijrosi ta’minlash choralarini ko‘rish bo‘yicha muhim vazifalar belgilab olindi.