Xorazmda test sinovlariga tayyorgarlik jarayoni va ta’lim muassasalari o‘rganildi
2025-07-14 14:15:00 / Vazirlik yangiliklari
Safar davomida dastlab, “Yoshlik” sport majmuasi manej binosi hamda Bilim va malakalarni baholash agentligi Xorazm viloyat bo‘limida abituriyentlar uchun yaratilgan shart-sharoitlar ko‘zdan kechirildi. Manej binosida 1 260 ta o‘rin, agentlik binosida esa 1 200 ta o‘rin tayyorlangan, har ikkala binoga UPS qurilmalari o‘rnatilgan. Ota-onalar uchun Urganch tumanidagi 48-sonli maktab va Ranch texnologiya universitetida kutish joylari tashkil etilib, test jarayonlarini onlayn kuzatish uchun katta monitorlar o‘rnatilgan.
Test o‘tkaziladigan binolarda tibbiyot punktlari, ortiqcha jihozlarni saqlash joylari, xavfsizlik va shaxsni identifikatsiya qilish qurilmalari ham tayyor holatga keltirilgan. Shuningdek, Favqulodda vaziyatlar boshqarmasi tomonidan tegishli xulosa va tavsiyalar berildi, qutqaruv guruhlari va yong‘in o‘chirish mashinalari navbatchilikka tayinlandi.
Shundan so‘ng, Urganch shahridagi 2- va 3-son politexnikumlarda olib borilayotgan qurilish va ta’mirlash ishlari ham ko‘zdan kechirildi. Bu yerda O‘zbekiston Respublikasi Prezidentining tegishli farmoniga asosan 2025/2026-o‘quv yilidan xalqaro “Pearson” dasturi joriy etiladi.
Shuningdek, Abu Rayhon Beruniy nomidagi Urganch davlat universitetida yangidan qurilgan Axborot-resurs markazi faoliyati bilan tanishildi. Zamonaviy markaz bir vaqtning o‘zida 1000 nafar foydalanuvchiga xizmat ko‘rsatish imkoniyatiga ega bo‘lib, Pekin-Urganch matematika markazi, 506 o‘rinli zal, muzey va qomusiy olimlar nomidagi o‘quv zallari bilan jihozlangan.
Safar yakunida mas’ullarga kelgusidagi vazifalar belgilab olindi.