Oʻzbekistonlik texnikum o‘quvchilari ilk bor Germaniyada amaliyot o‘taydi
2025-07-04 15:00:00 / Vazirlik yangiliklari
Dastur 2025-yil yanvarda Oliy ta’lim, fan va innovatsiyalar vazirligi, Gyote instituti va Germaniyaning Flensburg Savdo-sanoat palatasi o‘rtasida imzolangan uch tomonlama hamkorlik shartnomasi asosida tashkil etildi.
Kelishuvga muvofiq, 2025-yilning iyul oyida 7 nafar, avgust oyida esa 8 nafar texnikum o‘quvchisi Germaniyada yozgi amaliyot o‘tashi belgilangan.
Qayd etish joizki, amaliyot ishtirokchilari bir yil davomida Gyote institutida nemis tilini o‘rganib, A2–B1 darajadagi ko‘nikmaga ega bo‘ldilar. Bu ularning Germaniyadagi amaliyotga tayyorgarligini ta’minladi.
Bu tashabbus texnikum o‘quvchilarining xorijda amaliyot o‘tashi bo‘yicha O‘zbekistondagi ilk tajriba bo‘lib, yosh mutaxassislar salohiyatini oshirish va ta’lim tizimini xalqaro standartlarga yaqinlashtirishga xizmat qiladi.
Oliy ta’lim, fan va innovatsiyalar vazirligi kasbiy ta’lim sohasida xalqaro hamkorlikni mustahkamlash, o‘quvchilar uchun xorijiy amaliyot imkoniyatlarini kengaytirishga doimiy e’tibor qaratadi.