O‘zbekiston Respublikasi Oliy taʼlim, fan va innovatsiyalar vazirligi

Mazkur konferensiya global miqyosda oliy taʼlim sohasidagi integratsiya va oʻzaro ishonchni kuchaytirishda muhim qadam boʻlib xizmat qiladi. Xalqaro darajada diplom va kvalifikatsiyalarning oʻzaro tan olinishi, talabalar va professor-oʻqituvchilarning erkin harakatlanishi uchun huquqiy asoslarni mustahkamlash maqsadida tashkil etilgan ushbu anjuman, kelgusida taʼlim sifatini yanada oshirish va teng imkoniyatlarni taʼminlashga qaratilgan.

Hozirga qadar 38 ta davlat mazkur konvensiyani ratifikatsiya qilgan boʻlib, ular qatorida Avstraliya, Fransiya, Yaponiya, Kuba, Norvegiya, Vengriya kabi mamlakatlar bor. 2024-yilda 11 ta davlat ushbu hujjatni ratifikatsiya qilgan. Hozirda yana 20 dan ortiq davlat ratifikatsiya jarayonining ilgʻor bosqichida turibdi.

Soʻnggi yillarda Oʻzbekiston ham mazkur global jarayonda faol ishtirok etib kelmoqda. Mamlakatimiz milliy taʼlim tizimini xalqaro standartlarga moslashtirish, uni global akademik makonga integratsiya qilish yoʻlida izchil islohotlarni amalga oshirmoqda. Bu jarayonda taʼlim sifatini oshirish, akademik va professional mobillikni kengaytirish, mutaxassislarning xalqaro mehnat bozorida raqobatbardoshligini taʼminlash ustuvor maqsadlar sifatida belgilangan.

Ayni paytda, Markaziy Osiyo mintaqasida hali hech bir davlat ushbu konvensiyaga qoʻshilmagan. Oʻzbekiston mazkur jarayonda yetakchi davlat sifatida ishtirok etsa, bu nafaqat mamlakatimiz taʼlim tizimining xalqaro nufuzini oshirish, balki Oʻzbekistonning mintaqaviy va global siyosiy maydondagi mavqeini mustahkamlashda ham muhim tarixiy qadam boʻladi.