Özbekiston Respublikasi Ta’lim va ilm-fan vazirligi

Yigʻilishda taʼkidlanishicha, oliy taʼlim muassasalari olim va mutaxassislarini keng jalb etgan holda hududdagi ijtimoiy-iqtisodiy jarayonlarni muntazam tahlil qilib borish, mavjud imkoniyatlardan samarali foydalanish yoʻllari va yangi yoʻnalishlarni ishlab chiqish bugungi kunning dolzarb vazifasiga aylangan. Shuningdek, viloyat yalpi ichki mahsulotida turli iqtisodiyot tarmoqlarining oʻrni va ulushini chuqur tahlil qilish, ularni yanada kengaytirish boʻyicha ilmiy asoslangan takliflar tayyorlash zarurligi alohida urgʻu bilan qayd etildi.

Uchrashuvda hududda mavjud resurs va imkoniyatlardan oqilona foydalanish asosida ijtimoiy-iqtisodiy rivojlanishni taʼminlashga qaratilgan amaliy dasturlar ishlab chiqilishi, ushbu ishlanmalar mahalliy hokimiyat organlariga taqdim etilishi kerakligi taʼkidlandi. Shu bilan birga, viloyatdagi innovatsion faoliyat va texnologik imkoniyatlar toʻliq oʻrganilib, yangi texnologiyalarni joriy etish boʻyicha mahalliy hokimliklar, korxonalar va davlat organlariga aniq takliflar berish lozimligi taʼkidlandi.

Shuningdek, hududning iqtisodiy yuksalishi uchun zarur boʻlgan taʼlim va kadrlar salohiyatini baholash, ularning bilim va koʻnikmalarini tahlil qilish, mavjud muammolarni bartaraf etish yuzasidan ilmiy asoslangan yechimlar ishlab chiqish ham oliy taʼlim muassasalarining muhim vazifasi sifatida belgilandi. Investitsiya dasturlari, innovatsion tadbirkorlikni rivojlantirish va yangi mahsulotlar ishlab chiqarishga qaratilgan takliflar tayyorlash ham uchrashuv kun tartibining muhim bandlaridan biri boʻldi.

Yirik korxonalar va iqtisodiyotning drayver sohalari bilan “taʼlim – fan – innovatsiya” integratsiyasini taʼminlashga qaratilgan tadbirlarni tizimli ravishda amalga oshirish kerakligi qayd etildi. Bu orqali taʼlim sohasidagi ilmiy salohiyatni amaliyotga yaqinlashtirish, iqtisodiy islohotlar bilan uygʻun holda rivojlantirish imkoniyati yuzaga keladi.

Yigʻilish yakunida ushbu vazifalarni Qarshi va Nishon tumanlarini innovatsion hudud sifatida rivojlantirish tajribasi asosida amalga oshirish topshirildi. Shuningdek, Qarshi va Nishon tuman hokimlari oʻrinbosarlarining innovatsion rivojlanish boʻyicha hisobotlari eshitilib, kelgusi rejalar muhokama qilindi.