O‘zbekiston Respublikasi Oliy taʼlim, fan va innovatsiyalar vazirligi

O‘zbekiston va Rossiya o‘rtasidagi ta’lim sohasidagi strategik hamkorlik doirasida Toshkent shahridagi M.V. Lomonosov nomidagi Moskva davlat universiteti filialida 2025/2026 akademik yildan boshlab davlat boshqaruviga ixtisoslashtirilgan yangi magistratura dasturi ish boshlaydi. "Davlat siyosati va ijtimoiy-siyosiy xatarlarni boshqarish" yo‘nalishidagi ushbu dastur siyosiy jarayonlarni tushunish va davlat boshqaruvi sohasida samarali faoliyat yuritish qobiliyatiga ega mutaxassislar tayyorlashga qaratilgan.

Yangi loyiha "Politologiya" yo‘nalishi asosida ishlab chiqilgan bo‘lib, bitiruvchilarga "magistr" ilmiy darajasi berilishi ko‘zda tutilgan. Ta’lim jarayoni zamonaviy yondashuvlar, ilmiy tahlil va amaliyot uyg‘unligida tashkil etiladi.

Ayni paytda Toshkentdagi MDU filialida qator yo‘nalishlarda bakalavr va magistrlar tayyorlanmoqda. Jumladan, amaliy matematika va informatika, psixologiya, PR va reklama, rus filologiyasi, menejment hamda pedagogika kabi sohalarda ta’lim berilmoqda.

So‘nggi yillarda filial faoliyati izchil ravnaq topib, yangi ta’lim yo‘nalishlari joriy etildi. Mahalliy va xorijiy professor-o‘qituvchilar ishtirokidagi sifatli ta’lim natijasida talabalar Prezident va davlat stipendiyalariga sazovor bo‘lib kelmoqda. Har yili ko‘plab xalqaro mutaxassislar mashg‘ulotlarga jalb etilishi ta’lim mazmunini yanada boyitib, uni xalqaro darajaga olib chiqmoqda.