Oʻzbekiston va Koreya: agrar taʼlim va ilmiy hamkorlikka yangi surʼat berilmoqda
2025-05-03 22:45:00 / Vazirlik yangiliklari
Uchrashuvda shuningdek Toshkent davlat agrar universiteti rektori Narzullo Oblomurodov, Chungnam Milliy universiteti Boshqaruv qoʻmitasi rahbari Kvak De Xun, , Qishloq xoʻjaligi va tabiiy fanlar boʻyicha dekan Li Jun Xyon, hamda professor, loyiha rahbari Xan Suk Xo ishtirok etdilar.
S.Buzrukxonov Janubiy Koreya bilan aloqalar oxirgi yillarda sifat jihatdan yangi bosqichga koʻtarilganini qayd etar ekan, Inha, Adju, Puchon hamda Oʻzbekiston-Koreya xalqaro universitetlari kabi oliy taʼlim muassasalarining faoliyati buning yorqin namunasi ekanini taʼkidladi. Transport, mashinasozlik, arxitektura, geologiya, qayta tiklanadigan energiya manbalari, metallurgiya va agrar sohalarda yuqori malakali mutaxassislar tayyorlash muhim ahamiyat kasb etishi taʼkidlandi.
Uchrashuv chogʻida Chungnam Milliy universiteti prezidenti Jong Kyum Kim tomonidan Toshkent davlat agrar universitetida (TDAU) Chungnam universitetining Global Kampusini tashkil etish taklifi bildirildi.
Toshkent davlat agrar universiteti va Chungnam Milliy universiteti oʻrtasida bir necha yillardan buyon samarali hamkorlik yoʻlga qoʻyilgan boʻlib, ayniqsa, 2021–2028-yillarga moʻljallangan “Oʻzbekistonda qishloq xoʻjaligi muhitini yaxshilash hamda professional kadrlarni tayyorlash” loyihasi bu hamkorlikning muhim natijasi hisoblanadi.
Mazkur loyiha doirasida TDAUda Markaziy Osiyoda ilk bor “Bogʻdorchilik” va “Tuproqshunoslik” yoʻnalishlari boʻyicha sertifikatlash tizimini joriy etish, agrar mutaxassislar tayyorlash, professor-oʻqituvchilar salohiyatini oshirish hamda mavjud laboratoriyalarni modernizatsiya qilish yuzasida kelishuvga erishildi.
Shuningdek, 2025-yilda Koreyada oʻtkazilishi rejalashtirilayotgan Oʻzbekiston–Koreya universitetlari II-rektorlar forumida Chungnam Milliy universitetining ishtiroki va mazkur forum doirasida ikki tomonlama hamkorlik toʻgʻrisidagi Bitimni imzolash masalasi muhokama qilindi.