O‘zbekistonlik olimlar AQShda o‘tkazilgan xalqaro konferensiyada birinchi o‘rinni egalladi
2025-03-27 12:45:00 / Vazirlik yangiliklari
Anjumanda Harvard University, Massachusetts Texnologiya Instituti, Stanford University, Oak Ridge Milliy Laboratoriyasi, NASA, GE Aviation kabi dunyoning yetakchi tashkilotlaridan 4000 dan ortiq olimlar ishtirok etdi.
“University of Business and Science” Kuzatuv kengashi raisi, texnika fanlari doktori, professor Elyorjon Jumayev boshchiligidagi O‘zbekiston jamoasi “Yuqori entropiyali qotishmalarning mikrostrukturasi va mexanik xossalariga turli issiqlikdagi toblash (annealing) davomiyliklarining ta’siri chuqur tahlili” mavzusidagi ilmiy tadqiqoti bilan qatnashib, xalqaro hakamlar hay’ati tomonidan eng yuqori bahoga loyiq deb topildi. Tadqiqot zamonaviy materialshunoslik sohasidagi dolzarb muammolarga innovatsion yechim taklif etgani bilan e’tirof etildi.
Mazkur xalqaro anjuman aerokosmik, mashinasozlik va ilg‘or materiallar sohasidagi eng dolzarb ilmiy tadqiqotlar va innovatsiyalarni taqdim etish maqsadida har yili o‘tkaziladi.
Ma’lumot uchun tadqiqot mualliflari “University of Business and Science” universiteti professori Elyorjon Jumayev hamda O‘zbekiston Texnologik metallar kombinati vakillari Rahmatjon Gaipov, Omon Sultonov, Farhod Abdullayev, Amir Abidov, va Orifjon Mixliyev hisoblanadi.
O‘zbekiston olimlarining ushbu yutuqlari yurtimiz ilm-fanining xalqaro miqyosdagi o‘rnini mustahkamlash bilan birga, kelajakdagi ilmiy hamkorliklar uchun ham yangi imkoniyatlar eshigini ochadi.