Vazirlik Jamoatchilik kengashi Sirdaryodagi oliy va kasbiy taʼlim muassasalari rahbarlari bilan uchrashuv o‘tkazdi
2025-03-04 11:05:00 / Vazirlik yangiliklari
Unda Jamoatchilik kengashi raisi Feruza Rashidova, kengash aʼzolari va vazirlik Axborot xizmat rahbari Nazokat Abduqunduzova hamda Sirdaryo viloyati oliygohlari ilmiy jamoasi vakillari va texnikum direktorlari ishtirok etdi.
Oʻtgan muloqot davomida jamoatchilik nazoratini kuchaytirish, xalqaro reytinglarda taʼlim muassasalarining oʻrnini oshirish, kasbiy taʼlim muassasalarining xalqaro akkreditatsiyaga tayyorgarlik darajasi va taʼlim sifatini oshirish boʻyicha zamonaviy yondashuvlar muhokama qilindi.
Suhbatda xalqaro sertifikatlarning taʼlim sifati va bitiruvchilarning raqobatbardoshligini oshirishdagi roli, ilgʻor tajribalarni taʼlim jarayoniga joriy etish masalalariga alohida eʼtibor qaratildi.
Vazirlik Jamoatchilik kengashi raisi Feruza Rashidova ilmiy tadqiqot va real sektor integratsiyasi – ish beruvchilar, tadqiqotchilar va olimlar hamkorligini yoʻlga qoʻyish, ekologik muammolarni ilmiy yechimlar asosida hal etish hamda xalqaro sertifikatsiya tizimlari orqali bozor talablariga mos mutaxassislar yetishtirishda xorij tajribasi, mamlakatimizda ushbu tashabbuslarni amalga oshirish imkoniyatlari haqida batafsil maʼlumot berdi. Shuningdek, xalqaro hamkorlikni kengaytirish va yetakchi xalqaro olim hamda ekspertlar ishtirokida ilgʻor tajribalarni joriy etish borasida ham fikr almashildi.
Bu kabi konstruktiv uchrashuvlar oliy taʼlim muassasalarida jamoatchilik nazorati, akademik va ilmiy yutuqlar asosida xalqaro reytinglardagi oʻrnini oshirish, shuningdek, yosh olimlarning ilmiy tadqiqot faoliyati yanada rivojlanishiga xizmat qilishi qayd etildi.