Vazir o‘rinbosari Shahrisabz shahrida kasbiy va oliy ta’lim muassasalari faoliyati bilan tanishdi
2025-02-26 16:15:00 / Vazirlik yangiliklari
Dastlab, vazir o‘rinbosari Germaniyaning “Avestos” kompaniyasi loyihasi asosida tashkil etilgan 1-sonli politexnikum faoliyati bilan tanishib, o‘quv binosi, auditoriyalar va amaliy mashg‘ulot jarayonlarini ko‘zdan kechirdi.
Shuningdek, muassasa pedagoglari va o‘quvchilari bilan uchrashuv o‘tkazilib, kasbiy ta’lim tizimini rivojlantirish, amaliy mashg‘ulotlar samaradorligini oshirish va o‘quv jarayonlarini takomillashtirish masalalari muhokama qilindi.
Shu kuni Otabek Mahkamov Shahrisabz davlat pedagogika instituti huzuridagi Yoshlar markazi faoliyati bilan ham tanishdi. Markazda yoshlarga yaratilgan shart-sharoitlarni ko‘zdan kechirib, talaba-yoshlar bilan uchrashdi. Muloqot davomida ilmiy va ijodiy loyihalar taqdimoti o‘tkazildi, innovatsion ta’lim yondashuvlarini joriy etish hamda talabalar uchun qo‘shimcha imkoniyatlar yaratish bo‘yicha takliflar bildirildi.
Shu bilan birga ta’lim muassasalarining infratuzilmasini yaxshilash, o‘quv jarayonlarini yanada samarali tashkil etish hamda talabalar uchun amaliy ko‘nikmalarni oshirishga qaratilgan chora-tadbirlar muhokama qilindi.