Oʻzbekiston va Xitoy “yashil” energiya hamkorligini kengaytiradi
2025-02-24 17:00:00 / Vazirlik yangiliklari
CRRC ZELC kompaniyasi oʻzining shamol va quyosh energetikasi hamda energiya saqlash texnologiyalari boʻyicha tajribasini taqdim etdi. Shuningdek, kompaniya kadrlar tayyorlash va Oʻzbekiston sanoatining rivojiga hissa qoʻshish niyatini bildirdi. Vodoroddan foydalanish va energiya saqlash sohasidagi loyihalar ham taqdim etildi, ular mahalliy resurslardan samarali foydalanish va sanoatni rivojlantirishga qaratilgan qoʻshma hamkorlik dasturini oʻz ichiga oladi.
Hamkorlik doirasida shamol elektr stansiyalari va energiya saqlash uskunalari ishlab chiqarish zavodi qurilishi masalalari muhokama qilindi. Bunda “Xitoy texnologiyasi + Oʻzbekiston ishlab chiqarishi + Mintaqaviy bozor” modeli asosida xorijiy texnologiyalarni lokalizatsiya qilish masalalari koʻrib chiqildi. Shuningdek, ilmiy tadqiqotlarni rivojlantirish, infratuzilmani modernizatsiya qilish va tabiiy gaz oʻrniga elektr isitish tizimlarini joriy etish masalalari ham muhokama qilindi.
Shuningdek, uchrashuvda “yashil” energiya yoʻnalishida hamkorlikda laboratoriyalar tashkil etish taklifi ham ilgari surildi. Bundan tashqari, Oliy taʼlim, fan va innovatsiyalar vazirligi tasarrufidagi texnoparklardan birida “yashil” energiya boʻyicha pilot loyihani amalga oshirish boʻyicha takliflar bildirildi.