Yana bir oliygohning ta’lim dasturlari ASIIN xalqaro akkreditatsiyasidan muvaffaqiyatli o‘tdi
2025-01-30 20:40:00 / Vazirlik yangiliklari
Mazkur nufuzli agentlik tomonidan Nizomiy nomidagi Toshkent davlat pedagogika universitetining bakalavriat va magistratura bosqichlaridagi kimyo va biologiya yo‘nalishlari hamda mutaxassisliklari bo‘yicha ta’lim dasturlari xalqaro akkreditatsiyadan o‘tkazildi.
Akkreditatsiya jarayoni doirasida ASIIN xalqaro va mahalliy ekspertlari universitetga tashrif buyurib, oliygoh rahbariyati, ta’lim yo‘nalishlari va mutaxassisliklar bo‘yicha dars beruvchi professor-o‘qituvchilar, bitiruvchilarga ish beruvchi tashkilot vakillari hamda talabalarning fikrlarini tingladi. Shu bilan birga, ekspertlar kimyo va biologiya yo‘nalishlari bo‘yicha o‘quv laboratoriyalarining holati va jihozlanishini o‘rgandi.
Tahlillar natijasida mutaxassislar tomonidan ta’lim sifatini yanada oshirishga qaratilgan tavsiyalar berildi hamda kimyo va biologiya yo‘nalishlari bo‘yicha bakalavriat va magistratura ta’lim dasturlariga xalqaro sertifikat berish to‘g‘risida qaror qabul qilindi.
Mazkur akkreditatsiya natijasida:
✔️ ta’lim dasturlarining sifati va samaradorligi xalqaro darajada e’tirof etildi;
✔️ oliygoh infratuzilmasi va akademik salohiyati xalqaro talablarga mos ekani tasdiqlandi;
✔️ bitiruvchilarning ish bilan ta’minlanishi va mehnat bozorida talabgirligi yuqori ekani ko‘rsatildi;
✔️ davlat sektori va tashqi hamkorlar bilan hamkorlik faoliyati xalqaro miqyosda tan olindi.
Bu esa, Toshkent davlat pedagogika universitetining xalqaro ta’lim maydonidagi nufuzini yanada oshirishga xizmat qiladi.