Oliy ta’lim, fan va innovatsiyalar vazirligi delegatsiyasining Xitoyga safari davom etmoqda.
2024-11-21 17:35:00 / Vazirlik yangiliklari

Kollej rahbariyati bilan O‘zbekistondagi transport sohasida kadrlar tayyorlanadigan kasbiy ta’lim tashkilotlari bilan hamkorlik masalalari muhokama etildi. Xususan, Xitoy tomoni o‘zbekistonlik kasbiy ta’lim tashkilotlarining ishlab chiqarish ta’lim ustalarining stajirovkalarini tashkil etish, hamkorlikda ta’lim dasturlarini ishlab chiqish, qo‘shma ta’lim dasturlarini joriy etish bo‘yicha hamkorlik aloqalarini o‘rnatishga tayyor ekanligini ma’lum qildi.
Shuningdek, Xitoy bilan hamkorlikda oliy ta’lim sohasini rivojlantirish doirasida Xanchjou Dyanszi (Digital) universiteti vakillari bilan muzokaralar olib borildi.
Xitoyning ilg‘or oliy ta’lim tashkilotlaridan biri hisoblangan mazkur universitetda informatika, raqamli iqtisodiyot, menejment, sun’iy intellekt va axborot texnologiyalari yo‘nalishlari bo‘yicha malakali mutaxassislar tayyorlanadi.
Kun tartibidan qo‘shma ta’lim dasturlarini joriy etish, professor-o‘qituvchilar va talabalar almashinuvini yo‘lga qo‘yish, hamkorlikda ilmiy izlanishlar olib borish kabi masalalar o‘rin oldi.
Delegatsiya rahbari O.Mahkamov Xanchjou Dyanszi (Digital) universiteti rahbarlarini O‘zbekistonga taklif etdi va tashrif davomida axborot texnologiyalari va iqtisodiyot yo‘nalishlarida kadrlar tayyorlaydigan yetakchi oliy ta’lim tashkilotlari bilan hamkorlik aloqalarini o‘rnatish fikrini ilgari surdi.
Xitoy tomoni ushbu takliflarni qabul qilgan holda 2025-yilda albatta O‘zbekiston oliy ta’lim tashkilotlari bilan 2+2 qo‘shma ta’lim dasturlari, talabalar va o‘qituvchilar almashinuvi, yozgi qisqa muddatlari o‘quv kurslari bo‘yicha hamkorlikni yo‘lga qo‘yishini ma’lum qildi.



