Oliy ta’lim sohasida Yaponiya bilan hamkorlik istiqbollari muhokama qilindi.
2024-11-07 09:00:00 / Vazirlik yangiliklari
2024-yilning 29-oktabr – 1-noyabr kunlari O‘zbekiston Respublikasi Investitsiyalar, sanoat va savdo vaziri Laziz Qudratov boshchiligidagi O‘zbekiston delegatsiyasi tarkibida Oliy ta’lim, fan va innovatsiyalar vazirining birinchi o‘rinbosari Shohrux Daliyevning Yaponiyaga amalga oshirgan xizmat safari davomida qator uchrashuvlar tashkil etildi.
Xususan, Sh.Daliyev Yaponiyaning Ta’lim, madaniyat, sport, fan va texnologiyalar vazirligi (MEXT), davlat vaziri – vazirning birinchi o‘rinbosari, Yaponiya Parlament a’zosi TAKEBE Arata bilan uchrashdi.
Muloqot davomida Yaponiyaning Ta’lim, madaniyat, sport, fan va texnologiyalar vaziri, Yaponiya Parlament a’zosi ABE Toshiko xonim hamda vazirning birinchi o‘rinbosari, Yaponiya Parlament a’zosi TAKEBE Aratalarning 2025-yil O‘zbekistonga tashrifini tashkil etish hamda oliy ta’lim, fan va innovatsiyalar sohalarida istiqbolli rejalar yuzasidan fikr almashildi. Tashrif davomida Buxoro shahrida O‘zbekiston-Yaponiya oliy ta’lim muassasalari rektorlarining navbatdagi Beshinchi forumini o‘tkazish taklifi berildi.
Ma’lumot uchun, bu shakldagi forumlar 2011-, 2015-, 2019- va 2022-yillarda tashkil etilgan.
Muloqot davomida shuningdek, ikki davlat oliygohlari o‘rtasidagi hamkorlik holati, Yaponiya universitetlari bilan turli ta’lim yo‘nalishlari bo‘yicha “ikki diplom” (double-degree diploma) qo‘shma ta’lim dasturlarini yo‘lga qo‘yish hamda O‘zbekistondagi ta’lim faoliyatini Yaponiya universitetlarining o‘quv rejalari va dasturlari asosida amalga oshirishga kelishildi.
Shu bilan birga, yapon tili va adabiyoti, arxitektura va qurilish, energetika, muhandislik, qishloq xo‘jaligi, geologiya, tog‘-kon sanoati, biotexnologiyalar, nanotexnologiyalar, kimyo texnologiyalari, axborot texnologiyalari va boshqa yo‘nalishlar bo‘yicha ma’ruzalar o‘qish uchun yapon o‘qituvchilarini O‘zbekistonga taklif etish bo‘yicha o‘zaro kelishuvlarga erishildi.