Hurmatli vatandoshlar, talabalar, aziz doʻstlar!

Oliy taʼlim, fan va innovatsiyalar vazirligi nomidan barchangizni jonajon yurtimizda keng nishonlanayotgan qutlugʻ ayyom – Oʻzbek tili bayrami kuni bilan chin koʻngildan qutlayman. 

Davlatimiz rahbarining tashabbusi bilan mamlakatimizda oʻzbek tilining davlat tili sifatidagi oʻrni va ahamiyatini oshirish, uni zamon talablari asosida rivojlantirish borasidagi xayrli ishlar keng koʻlamda olib borilmoqda. Keyingi yillarda ona tilimiz nufuzli xalqaro anjumanlar, jumladan, Birlashgan Millatlar Tashkiloti minbaridan doimiy ravishda yangrab kelayotgani, dunyoda ona tilimizni oʻrganishga intilayotgan insonlar safining tobora kengayayotgani barchamizga gʻurur-iftixor baxsh etadi. 

Ona tilimizning davlat tili sifatidagi nufuzi va mavqeini oshirish borasidagi ishlarda vazirligimiz tizimidagi oliy va professional taʼlim muassasalarida bir qator ishlar amalga oshirilmoqda. Taʼlim dargohlarida xizmat qilayotgan olim va tadqiqotchilarimiz oʻzbek tilining nazariy-metodik asoslarini yaratish borasida koʻlamli ishlarni amalga oshirishdi. Keyingi yillarda “Oʻzbek tilining izohli lugʻati”, “Alisher Navoiy qomusi”, “Zahiriddin Muhammad Bobur ensiklopediyasi”, “Falsafa” qomusiy lugʻati, “Oʻzbekiston yuridik ensiklopediyasi”, “Islom ensiklopediyasi”, “Maʼnaviyat: asosiy tushunchalar lugʻati”, “Pedagogika: ensiklopediya”, “Tarix atamalari lugʻati”, “Adabiyotshunoslik lugʻati”, “Yuridik atamalar lugʻati” kabi qirqdan ziyod ziyod fundamental kitoblarning nashr etilishida oliy taʼlim dargohlarimizning koʻzga koʻringan professor va oʻqituvchilari ishtirok etgani quvonarlidir. 

Shular qatorida oʻzbek tilining elektron milliy korpusi va dasturiy mahsulotlarning oʻzbekcha ilovalarini yaratish, oʻzbek tilini Internet tarmogʻida ommalashtirish va munosib oʻrin egallashini taʼminlash, davlat tilini oʻrgatishga hamda matn tahririga moʻljallangan dasturlarni ishlab chiqish va amaliyotga tatbiq qilish boʻyicha ham koʻlamli ishlar amalga oshirildi. 

Mamlakatimizda oʻzbek tili va adabiyoti yoʻnalishida oliy maʼlumotli kadrlar tayyorlash hajmi hamda ilmiy tadqiqotlar soni ortib bormoqda. Hozirgi kunda jami oʻttizdan ortiq oliygohda  ushbu mutaxassislik boʻyicha kadrlar tayyorlanmoqda. Oliy taʼlim muassasalarida 7 ming nafardan ziyod fan nomzodlari va doktorlari, professor-oʻqituvchilar oʻzbek tili va adabiyotidan dars bermoqda.

Alisher Navoiy nomidagi Toshkent davlat oʻzbek tili va adabiyoti universiteti qoshidagi Davlat tilida ish yuritish asoslarini oʻrgatish va malaka oshirish markazida vazirlik, idora va tashkilotlar xodimlari oʻzbek adabiy tili meʼyorlari va imlo qoidalari boʻyicha muntazam oʻqitilmoqda. Universitetda tashkil etilgan “Oʻzbek maktabi”da esa yuzlab xorijlik fuqarolar ona tilimiz va milliy madaniyatimiz asoslarini katta qiziqish bilan oʻrganmoqda. Bu borada keyingi yillarda nashr etilgan oʻzbekcha-xitoycha, oʻzbekcha-inglizcha, oʻzbekcha-fransuzcha, oʻzbekcha-nemischa, oʻzbekcha-arabcha, oʻzbekcha-forscha lugʻat va soʻzlashgichlar muhim ahamiyat kasb etadi. 

Bu yil oliy taʼlim muassasalarining 6 mingdan ziyod talabalari ishtirokida “Ommaviy diktant” aksiyasi boʻlib oʻtdi. Shuningdek, yurtimizda tahsil olayotgan xorijlik talabalar oʻrtasida “Oʻzbek tili – qalbim tarjimoni” tanlovi muvaffaqiyat bilan oʻtkazildi. Vazirligimiz tizimidagi tashkilot va muassasalar Vazirlar Mahkamasi Davlat tilini rivojlantirish departamenti tomonidan har yili tashkil qilinadigan “Qadring baland boʻlsin, ona tilim” respublika tanlovida ishtirok etib, nufuzli oʻrinlarni qoʻlga kiritishmoqda.

Qadrli doʻstlar!

Bu yil oʻzbek tiliga davlat tili maqomi berilganligining 35 yilligi mamlakatimizda keng nishonlanmoqda. Vazirligimiz jamoasi nomidan butun xalqimizni, shu jumladan, oliy va professional taʼlim sohasida xizmat qilayotgan professor-oʻqituvchilarimizni hamda koʻp ming sonli ilmga chanqoq talabalarimizni 21-oktyabr – Oʻzbek tili bayrami bilan yana bir bor samimiy qutlaymiz, mustahkam sogʻliq, oilaviy baxt, xonadonlaringizga tinchlik-omonlik tilaymiz.

Mustaqilligimiz abadiy, buyuk maʼnaviy boyligimiz boʻlmish ona tilimiz mangu boʻlsin!