Ilk bor xorijlik talabalar o‘zbek tili bo‘yicha respublika olimpiadasida bellashmoqda
2026-10-16 19:00:00 / Vazirlik yangiliklari
O‘zbek tilini xorijlik talabalar o‘rtasida targ‘ib qilishga qaratilgan mazkur olimpiada respublikamizda ilk bor o‘tkazilmoqda. U davlat tilini o‘rganishga qiziqishni oshirish, milliy qadriyatlarimizga hurmatni mustahkamlash maqsadida tashkil etilib, unda respublikamizning turli hududlaridagi 46 ta oliy ta’lim tashkilotidan 100 nafarga yaqin xorijlik talaba ishtirok etib, o‘zbek tili bo‘yicha bilimlarini namoyon etmoqda.
Ochilish marosimidan so‘ng ishtirokchilar o‘zbek tili bo‘yicha bilim va ko‘nikmalarini namoyish etish uchun bellashuvlarga kirishdilar. Endilikda ular nafaqat o‘z bilimlarini sinovdan o‘tkazadilar, balki turli mamlakatlar va madaniyatlar vakillari bilan tajriba almashish imkoniyatiga ham ega bo‘ladilar.
Mazkur respublika olimpiadasi o‘zbek tilining xalqaro miqyosdagi nufuzini oshirish, uni xorijlik yoshlar orasida keng targ‘ib etish hamda ta’lim muassasalari o‘rtasidagi do‘stlik va hamkorlik aloqalarini mustahkamlash yo‘lidagi muhim tashabbuslardan biridir.
Barcha ishtirokchilarga omad, yuksak natijalar va muvaffaqiyat tilaymiz