O‘zbekiston Respublikasi Ta’lim va ilm-fan vazirligi

Raqamlar tilida murojaatlar tahlili

Vazirlik va uning tizim tashkilotlariga kelib tushgan murojaatlar tahlili aholining ushbu sohaga bo‘lgan e’tibori kuchayganini ko‘rsatadi. Hisobot davrida vazirlikka jami 9 589 ta murojaat kelib tushgan. Ushbu murojaatlar soni o‘tgan yilning mos davriga nisbatan 3,8 foizga (388 taga) kamaygan. Bu sohadagi muammolarning o‘z vaqtida bartaraf etilib borilayotgani va tizimli ishlarning samaradorligidan dalolat beradi.
Kelib tushgan murojaatlarning asosiy qismi — 8 311 tasi (85,8%) elektron shaklda yo‘llangan. Shuningdek, 964 tasi (10,8%) yozma va 314 tasi (3,4%) og‘zaki shaklda qayd etilgan.

Qaysi hududlardan murojaatlar ko‘p kelib tushgan?

Hududlar kesimidagi tahlillar murojaatlarning joylashuvi turlicha ekanini ko‘rsatadi. Xususan:
Toshkent shahri — 18,9% (1 817 ta);
Qashqadaryo viloyati — 8,5% (817 ta);
Samarqand viloyati — 8,2% (785 ta);
Farg‘ona viloyati — 7,8% (746 ta);
Surxondaryo viloyati — 7,7% (735 ta);
Toshkent viloyati — 7,2% (695 ta);
Andijon viloyati — 6,4% (616 ta);
Qoraqalpog‘iston Respublikasi — 5,6% (540 ta);
Namangan viloyati — 5,6% (536 ta);
Xorazm viloyati — 5,4% (522 ta);
Buxoro viloyati — 5,4% (521 ta);
Jizzax viloyati — 4,8% (456 ta);
Navoiy viloyati — 4,7% (454 ta);
Sirdaryo viloyati — 3,2% (304 ta).
Shuningdek, chet eldan kelib tushgan murojaatlar 0,5%ni (45 ta) tashkil etgan.

Murojaatlar qaysi masalalarga ko‘proq daxldor?

Fuqarolar tomonidan ko‘tarilgan masalalarning mazmuni o‘rganilganda, ular quyidagi asosiy toifalarga bo‘lindi:
Qabul jarayonlari va o‘qishga qabul qilish — 16,8% (1 606 ta);
O‘qishini ko‘chirish va qayta tiklash — 15,8% (1 505 ta);
Diplom masalasi — 10,5% (1 010 ta);
Ta’lim muassasasi faoliyatiga oid masalalar — 9,3% (895 ta);
Talabalar bilimini baholash va yakuniy davlat attestatsiyasi — 6,4% (613 ta);
Kontrakt to‘lovi — 5,9% (567 ta);
Ta’lim muassasasi xodimi faoliyatidan norozilik — 5,0% (479 ta);
Ish masalasi — 3,2% (308 ta);
Moliyaviy masalalar (ish haqi, stipendiya, moddiy yordam) — 3,1% (295 ta);
Talabalar turar joyi — 2,6% (251 ta);
Elektron platformalar faoliyati (HEMIS, kontrakt, transfer va boshqalar) hamda ilmiy tadqiqot faoliyati — har biri 1,8% atrofida;
Xorijiy ta’lim to‘g‘risidagi hujjatlarni tan olish (nostrifikatsiya), chet tilini bilish darajasini aniqlash test sinovlari hamda ma’lumotnoma olish kabi masalalar qolgan ulushni tashkil etdi.

Murojaatlarning hal etilish natijalari

Vazirlikka kelib tushgan har bir murojaat qonuniy tartibda ko‘rib chiqilib, tegishli choralar ko‘rilmoqda. Jumladan:
23,0% (2 201 ta) murojaat ijobiy hal etilgan;
30,1% (2 887 ta) holatda huquqiy ma’lumot berish orqali masala hal qilingan;
4,6% (444 ta) murojaat bo‘yicha zarur tushuntirishlar berilgan;
0,3% (26 ta) murojaat ko‘rmasdan qoldirilgan, 0,6% (61 ta)si tugatilgan;
Hududiy idoralarga 30,3% (2 905 ta), tegishli idoralarga esa 2,3% (217 ta) murojaat yo‘naltirilgan;
Ayni paytda 8,8% (846 ta) murojaatlar ko‘rib chiqilish jarayonida.

Bilvosita va jonli muloqotlar samarasi

Rasmiy yozma va elektron murojaatlardan tashqari, fuqarolar bilan bevosita muloqot qilishga ham alohida e’tibor qaratilmoqda. Xususan, hisobot davrida 70 nafar fuqaro shaxsiy qabullarda, 120 nafar fuqaro esa sayyor qabullarda qabul qilindi.
Shuningdek, ijtimoiy tarmoqlar orqali kelib tushgan 1 600 ta murojaatga tezkor javob qaytarilgan bo‘lsa, ishonch telefonlari orqali naq 83 ming nafar fuqaroga huquqiy maslahat va amaliy yordam ko‘rsatildi.