Joriy yilning 23-28-sentabr kunlari UrDPI tashkilotchiligida dunyoning 30 ga yaqin yetuk olimlarini jamlagan “Yangi avlod yupqa plyonkali fotovoltaik tizimlar uchun ilg‘or funksional materiallar” mavzusida xalqaro ilmiy-amaliy konferensiya bo‘lib o‘tmoqda
2024-09-28 17:00:00 / Vazirlik yangiliklari
Ushbu xalqaro konferensiyadan maqsad yupqa plyonkali fotovoltaik qurilmalar, qayta tiklanuvchan energetika sohasi kabi yetakchi yo‘nalishlar bo‘yicha so‘nggi yutuqlar, dolzarb muammolar va istiqbolli texnologiyalarni muhokama qilishdan iborat.
Ma’lumot uchun, tijoriy jihatdan samarali va ekologik toza qayta tiklanadigan energiya manbalarini rivojlantirish zamonaviy fan va texnologiyani joriy qilishni taqozo qiladi. Turli hisob-kitoblarga ko‘ra, 50-60 yildan 100-110 yilgacha davom etishi kerak bo‘lgan qazib olinadigan yoki uglevodorod yoqilg‘isi zaxiralarining doimiy ravishda kamayib borish sharoitida bunday muammoni hal qilish ayniqsa dolzarb hisoblanadi.
Shu bois muqobil qayta tiklanuvchi energiya manbalariga o‘tish masalasini hal etish jahon iqtisodiyoti barqaror rivojlanishining muhim kalitlaridan biriga aylanib bormoqda. Hozirgi vaqtda bunday energiya manbalarining bir qancha istiqbolli turlari mavjud bo‘lib, ular orasida quyosh, shamol va vodorod energiyasi eng istiqbolli hisoblanadi.