Oʻzbekiston milliy terma jamoasi vakillari Fargʻona davlat universitetida boʻldi
2026-09-24 10:05:00 / Vazirlik yangiliklari
Fabio Kannavaro FarDU futbol klubi prezidenti, universitet rektori Bahodirjon Shermuhammadov bilan uchrashdi. Muloqotda universitetda futbolni rivojlantirish, yosh futbolchilar uchun yaratilayotgan sharoitlar, ularning sport mahoratini oshirish hamda klubning kelgusidagi istiqbollari xususida fikr almashildi.
Terma jamoa bosh murabbiyi FarDU futbol klubiga qiziqishi yuqori ekanini taʼkidlab, klub stadionida yaratilgan sharoitlarni yuqori baholadi. Xususan, FarDU stadioni Fargʻona viloyatidagi eng yaxshi futbol maydonlaridan biri ekanini qayd etdi.
Muloqot davomida yosh futbolchilar bilan ishlash, ularning iqtidorini aniqlash va qoʻllab-quvvatlash, zamonaviy tayyorgarlik tizimini joriy etish hamda universitet futbol klubining professional sportdagi salohiyatini yanada yuksaltirish masalalariga alohida eʼtibor qaratildi.
Milliy terma jamoa vakillarining FarDUga tashrifi talabalar va yosh futbolchilar uchun ham muhim motivatsiya boʻlib, ularni sport bilan muntazam shugʻullanish, oʻz mahorati ustida ishlash va yuqori natijalar sari intilishga ruhlantirdi.