“Yangi Oʻzbekiston bunyodkorlari” sayilgohi — talabalar uchun yangi taʼlimiy va madaniy maskan
2026-09-12 15:25:00 / Vazirlik yangiliklari
Yangi maskan ilm-fan, taʼlim, sport, zamonaviy infratuzilma va ekologik yondashuvlarni bir hududda uygʻunlashtirgani bilan ahamiyatli. Sayilgoh talabalarning darsdan boʻsh vaqtini mazmunli oʻtkazishi, sport bilan shugʻullanishi, kitob oʻqishi va yangi loyihalar ustida ishlashi uchun moslashtirilgan.
Sayilgohni tashkil etishda ekologik muhitga ham alohida eʼtibor qaratilgan. Landshaft dizayni asosida manzarali daraxtlar va gullar ekilib, zamonaviy sugʻorish tizimlari oʻrnatilgan. Bu hududda talabalar uchun tabiat bilan uygʻun, obod va qulay muhit yaratish imkonini bergan.
Sayilgohda yugurish va velosiped yoʻlaklari, ochiq havoda kitob oʻqish va mustaqil taʼlim olish uchun maydonlar, loyihalar ustida ishlash va muhokama qilishga moʻljallangan Wi-Fi zonalari hamda buk-kafe tashkil etilgan.
Maskanning oʻziga xos jihatlaridan biri — uning oliy taʼlim yoʻnalishlari bilan bogʻlangan tematik bogʻlardir. Xususan, kimyo, biologiya, fizika, matematika, geologiya, energetika va IT yoʻnalishlariga mos yettita tematik bogʻ barpo etilgan.
Bu bogʻlar talabalarga nazariy bilimlarini amaliyot bilan bogʻlash, oʻrganayotgan fanlarini atrof-muhit bilan uygʻun holda anglash va yangi gʻoyalar ustida ishlash uchun qoʻshimcha imkoniyat yaratadi.
Sayilgohda tadbirkorlikni rivojlantirishga ham eʼtibor qaratilgan. Bu yerda sakkizta tadbirkorlik subyekti faoliyati yoʻlga qoʻyilib, 40 ta yangi ish oʻrni yaratilgan.
Hudud talabalar uchun kechki vaqtda ham xavfsiz va qulay boʻlishi maqsadida energiyatejamkor chiroqlar hamda tungi yoritish tizimlari bilan toʻliq jihozlangan.
Bugun “Yangi Oʻzbekiston bunyodkorlari” sayilgohi talabalar shaharchasida taʼlimdan tashqari vaqtni mazmunli tashkil etish, sport va kitobxonlikni rivojlantirish, ilmiy-ijodiy tashabbuslarni qoʻllab-quvvatlash uchun zamonaviy ochiq muhit sifatida xizmat qilmoqda.
Bu kabi maskanlarning tashkil etilishi talabalar shaharchasini faqat taʼlim olinadigan hudud emas, balki yoshlar bilim oladigan, muloqot qiladigan, sport bilan shugʻullanadigan va oʻz gʻoyalarini rivojlantiradigan yaxlit muhitga aylantirishga qaratilgan.