Prezident Shavkat Mirziyoyevga talabalar shaharchasidagi yangi raqamli xavfsizlik tizimi taqdim etildi
2026-09-12 12:00:00 / Vazirlik yangiliklari
Talabalar shaharchasida tashkil etilgan vaziyatlar markazi orqali hududdagi holatni real vaqt rejimida kuzatish, turli maʼlumotlarni yagona tizimda jamlash va tezkor tahlil qilish imkoniyati yaratildi.
Ayni paytda bu yerda toʻrtta universitet faoliyat yuritib, ularda 71 mingdan ziyod talaba tahsil oladi. 41 ta talabalar yotoqxonasida 15 ming nafar talaba uchun joy mavjud. Talabalar shaharchasiga bir kunda 80 mingdan ortiq talaba kelib-ketishi inobatga olingan holda, xavfsizlikni samarali tashkil etishga alohida eʼtibor qaratilmoqda.
Hududdagi universitetlar, yotoqxonalar, doʻkon va ovqatlanish shoxobchalari atrofini kuzatish uchun 117 ta kamera oʻrnatilgan. Tizimga qariyb 75 ming talabaning maʼlumotlari kiritilgan va u 17 ta axborot tizimi bilan integratsiya qilingan. Bu davomatni nazorat qilish, xavflarni barvaqt aniqlash va zarur choralarni tezkor belgilash imkonini beradi.
Yangi platforma doirasida talabalarni yotoqxonalarga joylashtirish jarayoni ham raqamlashtirilgan. Talaba onlayn ariza berganidan soʻng, tizim mavjud boʻsh oʻrinlarni koʻrsatadi va joylashtirish jarayoni elektron tarzda amalga oshiriladi. Bu inson omilini kamaytirish va maishiy korrupsiyaning oldini olishga xizmat qiladi.
Talabalar uchun ishlab chiqilgan mobil ilova orqali taʼlimga oid maʼlumotlarni olish, turli tashkilotlarga elektron murojaat yuborish va uning natijasini onlayn kuzatish mumkin. Ilovanga Toshkent shahri jamoat transporti haqidagi maʼlumotlar ham integratsiya qilingan.
Talabalar xavfsizligi uchun SOS tugmasi ham joriy etilgan. Favqulodda vaziyatda talaba tugmani bosishi orqali oʻzining joylashuvi haqida signal yuborishi mumkin. Bu huquqni muhofaza qiluvchi organlar yoki tez tibbiy yordam xodimlarining voqea joyiga tezkor yetib borishiga imkon beradi.
Platformada ota-onalar uchun ham alohida imkoniyatlar mavjud. Ular farzandining yotoqxonaga kirish-chiqishi, darslarga qatnashishi, oʻzlashtirishi va kontrakt toʻlovlari haqida onlayn maʼlumot olishi mumkin.
Tizimning yana bir muhim jihati — sunʼiy intellektdan foydalangan holda xavf guruhlarini aniqlash. Darslarni muntazam qoldirish, yotoqxonaga belgilangan vaqtdan kech qaytish, kontrakt toʻlovlarini oʻz vaqtida amalga oshirmaslik kabi holatlar tahlil qilinib, qoʻshimcha profilaktik ishlash talab etiladigan talabalar avtomatik ravishda aniqlanadi.
Jumladan, 36 soatdan ziyod dars qoldirgan talabalar tizim orqali avtomatik ravishda “qizil” toifaga oʻtkaziladi. Bu maʼlumotlar kuratorlar, profilaktika inspektorlari va taʼlim muassasasi masʼullariga talabalar bilan manzilli ishlash imkonini beradi.
Platforma bitiruvchilarning bandligini monitoring qilish imkonini ham qamrab olgan. Oʻtgan yili 17,5 ming nafar talaba bitirgan boʻlib, ularning 14 ming nafari ish bilan taʼminlangan. Ish bilan taʼminlanmagan bitiruvchilar haqida hududlar kesimida maʼlumot shakllantirilib, masʼul tashkilotlar ular bilan manzilli ish olib borishi mumkin.
Prezident Shavkat Mirziyoyev ushbu raqamli platformaning imkoniyatlarini yuqori baholab, uni respublikadagi boshqa talabalar turar joylarida ham joriy etish boʻyicha topshiriq berdi.
Davlat rahbari taʼkidlaganidek, bunday tizimlar nafaqat mavjud muammolarni aniqlash, balki ularning oldini olish, profilaktika ishlarini kuchaytirish va talabalar uchun xavfsiz muhit yaratishda muhim vosita boʻlishi mumkin.