Fargʻonalik yoshlar Janubiy Koreyada qoʻshma taʼlim dasturi asosida tahsil olmoqda
2026-09-10 09:00:00 / Vazirlik yangiliklari
Fargʻona viloyati hokimi Xayrullo Bozorov Janubiy Koreyadagi tashrifi doirasida Seul shahridagi Jungbu universitetida qoʻshma taʼlim dasturi asosida tahsil olayotgan fargʻonalik talabalar bilan uchrashdi.
Uchrashuvda viloyat hokimi mazkur dastur doirasida tanlovdan muvaffaqiyatli oʻtib, Janubiy Koreyaning nufuzli oliy taʼlim muassasasida bilim olish yoshlar uchun katta imkoniyat va ayni paytda masʼuliyat ham ekanini taʼkidladi.
Yoshlarning puxta bilim olishi, zamonaviy texnologiyalar va ilgʻor tajribalarni oʻzlashtirishi bugungi kunning muhim talabi ekani qayd etildi. Yurtimiz taraqqiyoti uchun chuqur bilim va zamonaviy koʻnikmalarga ega, raqobatbardosh va salohiyatli mutaxassislar zarurligiga alohida eʼtibor qaratildi.
Shuningdek, ilm olish doimiy jarayon ekani, rivojlangan davlatlarning ilm-fan, taʼlim va texnologiya sohalaridagi ilgʻor yutuqlarini oʻrganib, ularni yurtimiz taraqqiyoti yoʻlida qoʻllash muhimligi taʼkidlandi.
Muloqot davomida Janubiy Koreyaning “AHA Co., Ltd” kompaniyasi tomonidan 12 nafar fargʻonalik yoshning ishga qabul qilingani ham qayd etildi. Bu yoshlarning olgan bilimlarini amaliyotda mustahkamlashi, xalqaro tajriba orttirishi uchun muhim imkoniyat ekani bildirildi. Talabalarning kelgusidagi oʻqish va ishlariga omad tiladi.
Ochiq va samimiy ruhda oʻtgan muloqotda talabalar oʻzlarini qiziqtirgan masalalar, taklif va fikr-mulohazalarini bildirdilar.
Tadbirda “AHA Co., Ltd” kompaniyasi rahbari Ku Gi Do hamda Fargʻona shahridagi Koreya xalqaro universiteti rektori Pak Jun Xo ishtirok etdi.