Milliy yuksalish davri: oliy taʼlim tizimida 7 ta milliy dastur boʻyicha vazifalar muhokama qilindi
2026-09-04 18:00:00 / Vazirlik yangiliklari
Yigʻilishda Oʻzbekiston Respublikasi Prezidentining Davlat mustaqilligining 35 yilligiga bagʻishlangan tantanali marosimdagi nutqida belgilangan mamlakat taraqqiyotining yangi bosqichi, kelgusi oʻn yillikning Milliy yuksalish davri boʻlishi, shu maqsadda inson qadrini yanada yuksaltirishga qaratilgan 7 ta milliy dasturni amalga oshirish vazifalari muhokama qilindi.
Tadbirda mamlakat taraqqiyotining yangi bosqichi uchun belgilangan ustuvor vazifalarni amalga oshirishda oliy taʼlim muassasalarining oʻrni, professor-oʻqituvchilar va talaba-yoshlarning bu jarayondagi faol ishtirokiga alohida eʼtibor qaratildi.
Qayd etilganidek, 7 ta ustuvor yoʻnalishning mazmun-mohiyatini keng jamoatchilikka, ayniqsa, yoshlarga tizimli va taʼsirchan yetkazish, ularning mamlakatimizda amalga oshirilayotgan islohotlar haqidagi bilim va tasavvurlarini boyitish muhim ahamiyat kasb etadi.
Shu munosabat bilan oliy taʼlim muassasalarida “Har bir talaba — eʼtiborda” tamoyili asosida yoshlar bilan individual ishlash, ularning bilim va kasbiy koʻnikmalarini rivojlantirish, iqtidor va tashabbuslarini qoʻllab-quvvatlash masalalariga alohida eʼtibor qaratildi.
Yigʻilishda yoshlarni zamonaviy bilim va kasblarga yoʻnaltirish, mehnat bozori talablariga mos malakali kadrlar tayyorlash, dual taʼlim va amaliyotni kengaytirish, talabalarning bandligini taʼminlash masalalari ham muhokama qilindi.
Shuningdek, oliy taʼlim muassasalari tomonidan 7 ta ustuvor yoʻnalishning mazmun-mohiyatini targʻib qilish uchun yetakchi olimlar, professor-oʻqituvchilar va yosh tadqiqotchilardan iborat targʻibot guruhlarini shakllantirish vazifasi belgilandi.
Hududlarda uchrashuvlar, ilmiy-ommabop maʼruzalar, media chiqishlar va raqamli kontentlar orqali keng tushuntirish ishlarini tashkil etish zarurligi qayd etildi.
Yigʻilish davomida oliy taʼlim muassasalari faqat kadr tayyorlaydigan maskan boʻlib qolmasdan, oʻz hududlaridagi ijtimoiy-iqtisodiy masalalarni hal etishga, aholini zamonaviy kasblarga tayyorlashga va tadbirkorlik tashabbuslarini ilmiy-texnologik jihatdan qoʻllab-quvvatlashga xizmat qiluvchi amaliy markazga aylanishi zarurligi taʼkidlandi.