“Konfutsiy nomidagi O‘zbek-Xitoy instituti”ning yangi binosi ochildi
2024-09-10 11:05:00 / Vazirlik yangiliklari
Tadbirda Oliy ta’lim, fan va innovatsiyalar vazirligi vaziri Qo‘ng‘irotboy Sharipov, Xitoy Xalq Respublikasining mamlakatimizdagi elchisi Yu Jun, muassasa jamoasi, talabalar ishtirok etdi.
Bugungi kunda dunyoning 150 dan ziyod davlatida 500 dan ortiq Konfutsiy institutlari faoliyat yuritib kelmoqda. Mazkur institutlarning asosiy maqsadi xorijiy davlat vakillariga xitoy tilini o‘qitish va Xitoy madaniyatini tanishtirishga qaratilgan.
Vazir yangi bino foydalanishga topshirilgani bilan muassasa jamoasini samimiy qutlab, institut hozirgi globallashuv davrida xitoy tilini mukammal o‘zlashtirgan kadrlarni yetishtirib chiqaruvchi agregator sifatida davlatlaro strategik munosabatlarni rivojlatiriuvchi va madaniyatlararo muloqotni mustahkamlovchi ko‘prik vazifasini o‘tab kelayotganini alohida qayd etdi.
Tadbirda so‘zga chiqqanlar institut faoliyatidagi yutuqlar, akademik jamoasi haqida iliq fiklar bildirishib, kelgusidagi rejalari bilan o‘rtoqlashdilar. Mazkur institut xorijiy mamlakatlar ishida eng birinchi ta’sis etilgan Konfutsiy instituti hisoblanadi. 2006–2024-yillar davomida unda 10 000 dan ziyod o‘quvchi xitoy tilidan tahsil olib, o‘z faoliyatlarida qo‘llab kelmoqdalar. Konfutsiy institutlari ta’lim grantlari hamda XXRning davlat grantlari asosida 3000 dan ziyod o‘zbekistonlik yoshlar XXRning yetakchi OTMlarida yarim yillik, bir yillik, bakalavriatura, magistratura va doktorontura bosqichlarida ta’lim oldilar.
20 yillik faoliyati davomida TDShU huzuridagi “Konfutsiy nomidagi O‘zbek-Xitoy instituti” 2008, 2014, 2016-yillarda “Dunyoning eng birinchi Konfutsiy instituti”, “Eng ilg‘or Konfutsiy instituti” nominatsiyalarida g‘olib topilgan. Hozirda muassasada 8 nafar xitoylik o‘qituvchi va 8 nafar mahalliy o‘qituvchi xitoy tilidan saboq berib kelmoqda.