Press-tur: Talabalarni turar joy bilan ta’minlash jarayonlari va ular uchun yaratilgan sharoitlar o‘rganildi
2026-08-22 18:00:00 / Vazirlik yangiliklari
Unda OAV vakillari, jurnalist va blogerlar Toshkent davlat iqtisodiyot universiteti hamda O‘zbekiston davlat jahon tillari universitetida bo‘lib, talabalar turar joylarida yaratilgan sharoitlar va talabalarni joylashtirish jarayonlari bilan tanishdilar.
Ma’lum qilinishicha, so‘nggi yillarda talabalar turar joylari bilan qamrov darajasi 2017-yildagi 28 foizdan 2026-yilda 58 foizga yetkazilgan. Bugungi kunda davlat oliy ta’lim tashkilotlarida 394 ta talabalar turar joyi mavjud bo‘lib, ular 160 985 nafardan ortiq talabani joylashtirish imkoniyatiga ega.
Yangi o‘quv yili arafasida 17 ta oliy ta’lim tashkilotida 8 332 o‘rinli yangi talabalar turar joylari foydalanishga topshirilmoqda.
Shuningdek, yotoqxona bilan ta’minlanmagan talabalar uchun ijara xonadonlariga joylashtirish va ijara to‘lovining bir qismini kompensatsiya qilish mexanizmlari amalga oshirilmoqda. Bu borada 169 ta ko‘maklashish markazi va 767 nafar volontyor talabalarga amaliy yordam ko‘rsatadi.
Press-tur ishtirokchilari talabalar bilan muloqot qilib, ular uchun yaratilgan sharoitlar hamda yangi o‘quv yiliga tayyorgarlik jarayonlari bilan yaqindan tanishdilar.